Rossiyada “tilshunoslik politsiyasi”ni tuzish taklif qilindi

Rossiyada “tilshunoslik politsiyasi”ni tuzishni taklif qilishdi, deb yozadi TJournal.

Adabiyot va rus tili o‘qituvchilari shu tariqa rus tilini chet tilidan o‘zlashtirilgan so‘zlardan himoya qilmoqchi.

“Men o‘ylaymanki, ‘tilshunoslik politsiyasi’ga — bu umuman olganda politsiya bo‘linmasi ham bo‘lishi mumkin — boshidan maqom va vakolat taqdim etilsa, bu loyiha kelajakda vaziyatni o‘zgartirishi mumkin. Hozir qahvaxonalarimiz, do‘konlarimiz nomlariga qarang — aynan shular bola uchun til muhitini ta’minlaydi. Ya’ni u so‘zlarning noto‘g‘ri qiyofasini ko‘radi, lotin harflari kirill harflari bilan aralashib ketgan so‘zlarni ko‘radi va buni o‘ziga singdirib oladi”, — dedi prezident huzuridagi rus tili bo‘yicha kengash a’zosi Roman Doshchinskiy.

Tashabbus mualliflari Fransiyada amal qiladigan “Tubon qonuni”ni misol qilib keltirdi. U nomlarda, e’lonlarda, reklamada, tovar va xizmatlar nomlanishida, shuningdek, moliyaviy hisobotlarda davlat tilidan majburiy tarzda foydalanilishini talab qiladi.