“Vorksla” o‘zbekistonlik Sanjar Tursunov bilan birinchi o‘yinda Ukraina chempioni maydonidan g‘alaba bilan qaytdi

Ukrainaning “Vorskla” klubi O‘zbekiston milliy terma jamoasi a’zosi Sanjar Tursunovni o‘z safiga qayta qo‘shib olgandi. Bunga qadar Qatarning “Umm Salal” klubida to‘p surgan Sanjar 27-avgust kuni “Vorskla”ga qaytganidan keyingi ilk uchrashuvida maydonga tushdi.

Ungacha Ukraina chempionatida o‘tkazilgan 5 ta o‘yinda 1 ta g‘alaba, 1 ta mag‘lubiyat va 3 ta durang qayd etgan “Vorskla”, Tursunovning tashrifidan keyin Kiyevda “Dinamo”ni mag‘lub etdi — 2:0.

Yevropa Chempionlar Ligasining “B” guruhida “Benfika” (Portugaliya), “Napoli” (Italiya), “Beshiktosh” (Turkiya) klublari bilan kurash olib boradigan “Dinamo” Ukrainaning amaldagi chempioni hisoblanadi. Yangi mavsumda Kiyev klubi ketma-ket besh turni o‘z foydasiga hal qilgandi.

“Dinamo”ga qarshi safar uchrashuvida Sanjar Tursunov 72-daqiqaga kelib maydonga tushdi. Bunga qadar “Vorskla” 2 ta gol urishga muvaffaq bo‘lgandi.

Bu g‘alaba “Vorskla”ni 9 ochko bilan turnir jadvalida 4-o‘ringa olib chiqdi.