“Angren-Pop” elektrlashtirilgan temir yo‘li qurilishi barobarida mazkur yo‘nalish bo‘ylab bir qator zamonaviy inshootlar bunyod etildi. Ulardan biri “Andijon” vokzalidir, deya xabar beradi “O‘zbekiston temir yo‘llari” AJ axborot xizmati.
2016-yil iyun oyida foydalanishga topshirilgan vokzal binosi ilgari bir paytning o‘zida 50 nafar yo‘lovchiga xizmat ko‘rsatgan bo‘lsa, endi uning imkoniyati 350 nafar yo‘lovchiga yetdi. Ma’muriy bino va chipta sotish kassa zali alohida qurildi. Poyezdlar kelib-ketishi haqida axborot beruvchi ma’lumotxona hamda vokzal ishchi-xodimlari uchun alohida xonalar barpo etildi. Shuningdek, ona va bola xonasi, tibbiyot punkti, valyuta ayirboshlash shoxobchasi, barcha qulayliklarga ega shinam mehmonxona, yuklarni saqlash zali faoliyat ko‘rsatib kelmoqda. Jahon andozalariga to‘la javob beradigan VIP-zali zamonaviy ko‘rinishi, shinamligi bilan yo‘lovchilar e’tirofiga sazovor bo‘lmoqda.
Vokzalning old maydoni obodonlashtirilib, xiyobon, favvora va avtomobillar uchun turar joylar barpo etildi. Manzarali daraxtlar va gul ko‘chatlari o‘tqazildi. Aholi hordiq chiqarishi uchun maxsus o‘rindiqlar o‘rnatilib, tungi chiroqlar bilan bezatildi.
Izoh (0)