Angliyaning “Chelsi” klubi 2025-yilgi Klublar o‘rtasidagi Jahon chempionati finalida Fransiyaning “Pari Sen-Jermen” jamoasini 3:0 hisobida mag‘lub etdi. “Ko‘klar” ushbu turnirdagi ishtiroki uchun jami 120 million dollar (taxminan 103 million yevro) miqdorida mukofot puli ishlab oldi. Bu haqda jurnalist Ben Jeykobs xabar berdi.
Klub turnirdagi ishtiroki uchun ma’lum miqdorda mukofot puli olgan bo‘lsa, guruh bosqichidagi har bir g‘alabasi uchun — 2 mln dollarni qo‘lga kiritdi. “Aristokratlar” 1/8 finaldagi g‘alaba uchun 7,5 mln yevro, chorak final uchun 12,5 mln yevro, yarim final uchun 21 mln yevro va finaldagi g‘alaba evaziga 40 mln yevro mukofot puliga ega chiqdi.
“Chelsi” guruh bosqichida “Flamengo”ga mag‘lub bo‘lsa-da, “Esperans” va “Los-Anjeles” jamoalarini ortda qoldirib, ikkinchi o‘rinni egallagan holda pley-offga yo‘l oldi. Londonliklar final yo‘lida “Fluminense” (2:0), “Palmeyras” (2:1) va “Benfika” (4:1) ustidan g‘alaba qozondi. Jamoa hal qiluvchi uchrashuvda “PSJ”ni Koul Palmerning dubli hamda Joao Pedroning goli evaziga yirik hisobda g‘alaba qozonib, bosh sovrinni qo‘lga kiritdi.
Finalda ikkita gol muallifiga aylangan Koul Palmer turnirning eng yaxshi futbolchisiga aylangan bo‘lsa, “Chelsi” posboni Robert Sanches eng yaxshi darvozabon sovrini qo‘lga kiritdi. “PSJ” a’zosi Dezire Due esa musobaqaning eng yosh futbolchisi mukofotiga ega chiqdi.
Izoh (0)