Foto: Chiqindixonaga aylangan Yusufxona
Facebook’dagi “Voditeli Tashkenta (Drivers.uz)” guruhi a’zolaridan biri Toshkent viloyatidagi Yusufxona dam olish zonasida vaziyat yuzasidan e’tirozli fikr bildirdi.
“Dam olish zonasiga darvozasiga yaqinlashishim bilan, xodim joyidan ham turmasdan, mashina ichida necha kishi borligini va mashinani ham qo‘shib hisoblab, kirish uchun 17 ming so‘m to‘lashim kerakligini aytdi. Bunisi mayli, ichkariga kirishim bilan, qandaydir ko‘zni quvnatadigan manzarani ko‘rish o‘rniga, Yusufxona dam olish zonasining butun hududi fuqarolarimiz, do‘stlarimiz, tanishlarimiz tomonidan tashlab ketilgan chiqindilarga to‘la ekaniga guvoh bo‘ldim”, — deb yozadi foydalanuvchi.
“Qayerga qarama, hammayoq bo‘sh plastik idishlarning qoldiqlari, banan bo‘choqlari, singan shisha idishlar va sanab-sanog‘iga yetib bo‘lmaydigan yana ko‘plab narsalarni ko‘rib, ko‘nglim hijil bo‘ldi. Shunga qaramay, u yerda ko‘pchilik dam olishda davom etmoqda va, hordiq chiqarib bo‘lganidan keyin, o‘zidan qolayotgan chiqindilarni olib ketish o‘rniga, shu yerning o‘zida qoldirib ketyapti”, — deydi Facebook foydalanuvchisi.
“Kirish vaqtida tashrifchilardan pul yig‘ish ishini yaxshi bajarayotgan Yusufxona ma’muriyati esa dam olish hududini ozoda saqlashga ortiqcha urinayotgani ham yo‘q. Do‘stlar, nahotki yuzlab kilometr yo‘l bosib kelib, mana shunday manzara guvohiga aylanish sizga ma’qul bo‘lsa?! Kelinglar, bunday hududlarni ozoda saqlaylik”, — deb qo‘shimcha qilgan xabar muallifi.
Xabar ostida 150 dan ortiq fikr qoldirilgan. Guruhning aksariyat a’zolari xabar muallifining fikrlarini ma’qullagan. Bir qator foydalanuvchilar kirishda pul yig‘ayotgan shaxslarning faoliyati qay darajada qonuniy ekanligiga qiziqqan. Fikr bildiruvchilarning ba’zilari chiqindiga to‘la bunday joylarni hozirda nafaqat shahar tashqarisidagi dam olish joylarida, balki shaharlarning markazlarida ham uchratish mumkinligini afsus bilan qayd etib, kishi tarbiyani avvalo o‘zidan boshlashi kerakligini uqtirgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
