“O‘zbekiston havo yo‘llari” Rossiyaning S7 Airlines aviakompaniyasi bilan kod-shering bitimini tuzdi

“O‘zbekiston havo yo‘llari” milliy aviakompaniyasi va Rossiyaning S7 Airlines aviakompaniyasi birgalikdagi reyslarni amalga oshirishni ko‘zda tutuvchi kod-shering bitimini tuzdi, deb yozadi “Gazeta.uz”.

Rossiya aviatashuvchisining matbuot xizmati xabariga ko‘ra, bitim Novosibirsk va Toshkent o‘rtasidagi parvozlarni ko‘paytirish imkonini beradi. S7 Airlines ikki shahar o‘rtasida har haftaning yakshanba kuni o‘z reyslarini amalga oshiradi. Endi jadvalda dushanba va payshanba kunlari amalga oshiriladigan yana ikkita reys paydo bo‘ladi.

Bundan tashqari, S7 Airlines yo‘lovchilari “O‘zbekiston havo yo‘llari” havo kemalarida to‘g‘ridan-to‘g‘ri reys bilan Namanganga yo‘l olish imkoniyatini qo‘lga kiritadi. O‘z navbatida, O‘zbekiston Milliy aviakompaniyasi kodi S7 Airlines’ning Novosibirsk—Toshkent va Novosibirsk—Farg‘ona reyslarida paydo bo‘ladi.