Facebook’даги «Водители Ташкента (Drivers.uz)» гуруҳи аъзоларидан бири Тошкент вилоятидаги Юсуфхона дам олиш зонасида вазият юзасидан эътирозли фикр билдирди.
«Дам олиш зонасига дарвозасига яқинлашишим билан, ходим жойидан ҳам турмасдан, машина ичида неча киши борлигини ва машинани ҳам қўшиб ҳисоблаб, кириш учун 17 минг сўм тўлашим кераклигини айтди. Буниси майли, ичкарига киришим билан, қандайдир кўзни қувнатадиган манзарани кўриш ўрнига, Юсуфхона дам олиш зонасининг бутун ҳудуди фуқароларимиз, дўстларимиз, танишларимиз томонидан ташлаб кетилган чиқиндиларга тўла эканига гувоҳ бўлдим», — деб ёзади фойдаланувчи.
«Қаерга қарама, ҳаммаёқ бўш пластик идишларнинг қолдиқлари, банан бўчоқлари, синган шиша идишлар ва санаб-саноғига етиб бўлмайдиган яна кўплаб нарсаларни кўриб, кўнглим ҳижил бўлди. Шунга қарамай, у ерда кўпчилик дам олишда давом этмоқда ва, ҳордиқ чиқариб бўлганидан кейин, ўзидан қолаётган чиқиндиларни олиб кетиш ўрнига, шу ернинг ўзида қолдириб кетяпти», — дейди Facebook фойдаланувчиси.
«Кириш вақтида ташрифчилардан пул йиғиш ишини яхши бажараётган Юсуфхона маъмурияти эса дам олиш ҳудудини озода сақлашга ортиқча уринаётгани ҳам йўқ. Дўстлар, наҳотки юзлаб километр йўл босиб келиб, мана шундай манзара гувоҳига айланиш сизга маъқул бўлса?! Келинглар, бундай ҳудудларни озода сақлайлик», — деб қўшимча қилган хабар муаллифи.
Хабар остида 150 дан ортиқ фикр қолдирилган. Гуруҳнинг аксарият аъзолари хабар муаллифининг фикрларини маъқуллаган. Бир қатор фойдаланувчилар киришда пул йиғаётган шахсларнинг фаолияти қай даражада қонуний эканлигига қизиққан. Фикр билдирувчиларнинг баъзилари чиқиндига тўла бундай жойларни ҳозирда нафақат шаҳар ташқарисидаги дам олиш жойларида, балки шаҳарларнинг марказларида ҳам учратиш мумкинлигини афсус билан қайд этиб, киши тарбияни аввало ўзидан бошлаши кераклигини уқтирган.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)