7 yoshli Afruza Hamdamova shaxmat bo‘yicha Osiyo Chempionatida 3 ta oltin medalga ega chiqdi

Eron mezbonlik qilgan shaxmat bo‘yicha maktab o‘quvchilari o‘rtasidagi Osiyo Chempionatida O‘zbekiston terma jamoasi umumjamoa hisobida 3-o‘rinni egalladi. O‘zA ma’lumotiga ko‘ra mamlakat delegatsiyasi 6 ta oltin, 3 ta kumush va 2 ta bronza medalini qo‘lga kiritgan.

Oltin

7 yoshgacha bo‘lgan o‘quvchilar o‘rtasidagi turnirlarda o‘zbekistonlik Afruza Hamdamovaga uch yo‘nalish bo‘yicha hech bir sportchi teng kela olmadi. U rapid va blitsda ham barcha raqibalarini mag‘lub etishga muvaffaq bo‘ldi.

Xumoyun Sindorov ham 7 yoshgacha bo‘lgan shaxmatchilarning rapid bellashuvlarida barchadan ko‘p ochko to‘pladi. Alixon Avazxonov O‘zbekiston terma jamoasi uchun beshinchi oltin medalni taqdim etgan bo‘lsa, 15 yoshgacha bo‘lgan o‘quvchilar to‘qnashuvining blits qismida Daler Vohidov Osiyo chempionligini qo‘lga kiritdi.

Kumush

Alixon Avazxonov Afruza Hamdamova singari har uchala musobaqada sovrinli bo‘ldi. Rapid va blitsda 2-o‘rinlarni egallagan 7 yoshli sportchi 2 ta kumush medalni delegatsiya uchun taqdim etdi. Uchinchi kumush esa rapidning qizlar o‘rtasidagi bellashuvida ishtirok etgan Nozima Valiyevaniki bo‘ldi.

Bronza

Nozima Valiyeva blitsda ham kumushga ega bo‘lishga harakat qilib, yakunda bronza bilan cheklandi. 9 yoshgacha bo‘lgan sportchilar o‘rtasidagi turnirda Rasul Abdullayev yana bir bronzani qo‘lga kiritdi.