Qirolicha Yelizaveta II ning evarasi Jorjning tug‘ilgan kuni munosabati bilan Kensington saroyi shahzodaning yangi fotosuratlarini e’lon qildi. Suratlar shahzoda Uilyam va uning rafiqasi Keytning Norfolk grafligida joylashgan Anmer Xoll dala hovlisida suratkash Mett Portous tomonidan tushirilgan, deb xabar bermoqda “Interfaks”.
Fotosuratlardan birida yosh shahzoda yo‘l-yo‘l jemper va kalta ishtonda sayr qilib yurgani aks etgan. Yana bir suratda esa mitti aslzoda yog‘och halinchakda uchayotganini ko‘rish mumkin.
22-iyul, juma kuni uning ota-onasi tug‘ilgan kun munosabati bilan tantanali oqshom uyushtiradi. Anmer Xollda oilaning qarindoshlari va yaqinlari to‘planadi. Bayramga Jorjning Westacre Montessori School bolalar bog‘chasidagi do‘stlari ham tashrif buyurishi mumkin.
Matbuot Keyt va Uilyam farzandlariga bishon frize zotidagi it sovg‘a qilmoqchiligini yozmoqda. Bundan tashqari, valiahd shahzoda Charlz nevarasiga agent 007 — Jeyms Bondga tegishli “Aston Martin” mashinasining mitti reproduksiyasini xarid qilgani ma’lum.
Sovg‘alar orasida, shuningdek, regbi va futbol uchun libos, mitti elektr poyezd, organik paxtadan tikilgan ko‘ylak borligi xabar qilinmoqda. Bularni shahzoda Jorjga xolasi Pippa Middlton sovg‘a qilishi kutilmoqda.
Izoh (0)