Osiyo Chempionatida o‘rtacha 2,5 tadan gol urgan Tojikiston termasi O‘zbekistonga qarshi 1 ta o‘yinda 5 ta gol urdi

O‘zbekiston va Tojikiston futzal terma jamoalari o‘rtasidagi uchinchi o‘rtoqlik o‘yinida 5:5 hisobidagi durang natija qayd etildi.

“O‘zbekiston” sport majmuasida bo‘lib o‘tgan bellashuvda hisob tojikistonliklar tomonidan 7-daqiqada ochilgan bo‘lsa, 12-daqiqaga kelib Dilshod Rahmatov hisobni tenglashtirdi.

Shundan keyin tojikistonlik futzalchilar ketma-ket uchta gol urib, hisobni yirik ko‘rinishga olib keldi. 27-daqiqadan 35-daqiqaga qadar esa o‘zbekistonliklar kambek amalga oshirib, Eldor Hoshimov, Ilhom Hamroyev, Dilmurod Shavkatov va Dilshod Irsaliyevning 1 tadan goli sabab oldinga o‘tib oldi.

39-daqiqaga kelib Fayzali Sardorov Tojikiston terma jamoasini mag‘lubiyatdan qutqarib qolgan golga mualliflik qildi. Sardorov Jahon Chempionati ishtirokchisi bo‘lgan O‘zbekiston darvozasiga 3 ta o‘yinda 6 ta gol kiritishga muvaffaq bo‘ldi.

Tojikiston terma jamoasiga qarshi birinchi o‘yinda 3:3 hisobi qayd etilgan bo‘lsa, ikkinchi o‘rtoqlik o‘yinida O‘zbekiston 2:1 hisobida muvaffaqiyat qozongandi.