Yevropada xavfsizlik va hamkorlik tashkiloti bosh kotibi Donbassga politsiya missiyasi yuborilishi mumkinligini aytdi

Yevropada xavfsizlik va hamkorlik tashkiloti Donbassda saylovlar o‘tkazishda yordam berish uchun Ukraina janubi-sharqiga qurollangan politsiya missiyasini yuborish imkoniyatini ko‘rib chiqmoqda. Bu haqda YeXHT bosh kotibi Lamberto Zanyer ma’lum qildi, deb yozadi Associated Press.

Missiya mamlakat rahbariyati, shuningdek, Donetsk va Lugansk xalq respublikalari hukumatlari roziligi bilangina ishtirok etishi mumkin.

Zanyerning so‘zlariga ko‘ra tashkilot saylovlarda xavfsizlikni ta’minlash uchun yuzlab qurolli xodimlarni yuborishga tayyor. “Ushbu politsiya operatsiyasi hududda qonun va tartibni saqlab turishi, shuningdek, saylovlarni o‘tkazish uchun xavfsiz sharoitlarni ta’minlab turishi mumkin bo‘lardi”, — dedi YeXHT bosh kotibi.

18-may kuni Ukraina Markaziy saylov komissiyasi rahbariyati Donbassning Kiyev nazorati ostida bo‘lmagan hududlarida kamida ikki yildan keyingina saylov o‘tkazish mumkin bo‘lishini aytgan edi. Avvalroq esa Ukraina prezidenti Pyotr Poroshenko DNR va LNRda saylovlarni faqat YeXHT politsiya missiyasi yordamidagina o‘tkazish mumkinligini ta’kidlagan edi.