AQSh halokatga uchragan A320 bortidagi terakt haqidagi versiyani tasdiqlamadi

AQShning bir nechta muassasalari mansabdorlari Reuters’ga sun’iy yo‘ldoshdan olingan suratlarning amerikalik mutaxassislar tomonidan dastlabki tahlili EgyptAir aviakompaniyasining g‘oyib bo‘lgan A320 layneri bortida portlash sodir bo‘lganidan darak beruvchi belgilarni aniqlamaganini ma’lum qildi. Bu haqda “Kommersant” xabar berdi.

Agentlik manbalariga ko‘ra, AQSh hozircha samolyot halokati sabablarining hech qaysi versiyalarini istisno qilmayapti. Halokatning sabablari sifatida mexanik buzilish, terakt, uchuvchining yoki ekipaj a’zolarining qasddan qilingan xatti-harakatlari va boshqalar ko‘rib chiqilmoqda.

Oq uy matbuot kotibi Josh Ernest AQSh hozircha A320 halokatining aniq sabablari haqida ma’lumotga ega emasligini qo‘shimcha qildi.

Ilgariroq AQSh razvedkasi halokatning asosiy sababi sifatida teraktni ko‘rayotgani xabar qilingan edi. Bundan tashqari, Misr fuqarolik aviatsiyasi vaziri Sharif Fathiy terrorchilik hujumi aqlga kelayotgan birinchi ehtimol ekanligini tan olgandi.

Parijdan Qohiraga uchayotgan samolyot Gretsiya havo hududiga kirgandan 20 daqiqa o‘tib, radarlardan g‘oyib bo‘ldi. MS804 reysi bortida 56 nafar yo‘lovchi (ulardan uch nafari bola) va o‘n nafar ekipaj a’zosi bor edi. Ularning taqdiri hozircha noma’lum.