Professional boksning superog‘ir vazn toifasida Jahon boks assotsiatsiyasi (WBA)ning muntazam chempioni, avstraliyalik 37 yoshli Lukas Braunning doping uchun topshirgan takroriy test namunalarida taqiqlangan klenbuterol moddasi borligi aniqlandi va u chempionlik kamaridan mahrum etilib, 6 oyga boksdan chetlatildi. WBA o‘z versiyasi bo‘yicha chempionlik unvonini Ruslan Chagayevga qaytardi. 37 yoshli o‘zbekistonlik bokschining menejeri Timur Dugazayevning ma’lum qilishicha, Chagayev Puerto-rikolik Fres Okendoga qarshi jang o‘tkazishi kerak bo‘ladi, deb xabar bermoqda “TASS”.
“Kecha Braun chempionlik kamaridan mahrum qilingani va yarim yilga diskvalifikatsiya qilingani haqidagi qarorni oldik. Ruslan ayni damda AQShda. Okendo bilan jang borasida kelishib olishimiz uchun 3 oy muhlat berildi. Ruslanda superog‘ir vazn turnirining finaliga chiqish imkoniyati bor. Ishlashda davom etish kerak”, – dedi Timur Dugazayev.
WBA rasmiy saytida ma’lum qilinishicha, Ruslan Chagayevga chempionlik jangini o‘tkazish huquqiga ega bo‘lgan Fres Okendo bilan jang qilish borasida muzokara o‘tkazishi uchun 120 kun muhlat berilgan.
Eslatib otamiz, Ruslan Chagayev va Lukas Braun o‘rtasidagi chempionlik jangi 5-mart kuni Grozniy shahrida o‘tkazilgandi. Unda o‘zbekistonlik bokschi raqibiga 10-raundda texnik nokaut bilan mag‘lub bo‘lgandi.
Izoh (0)