Toshkentda 5-aprel, seshanba kuni “Yo‘l harakati xavfsizligini ta’minlash bo‘yicha tadbirlar samaradorligini oshirishda O‘zbekistonga ko‘mak” loyihasi doirasida davra suhbati bo‘lib o‘tdi. Tadbir O‘zbekiston Ichki ishlar vazirligi hamda Yevropada Xavfsizlik va hamkorlik tashkilotining O‘zbekistondagi vakolatxonasi tomonidan tashkil etildi.
Tadbirda Oliy Majlis Qonunchilik palatasi, Vazirlar Mahkamasi, Avtomobil va daryo transporti agentligi, “O‘zavtoyo‘l” davlat aksiyadorlik kompaniyasi, Toshkent shahar hokimligi va boshqa manfaatdor tashkilotlar, shuningdek, OAV vakillari qatnashdi.
Davra suhbatining birinchi qismida O‘zbekistonda 1-martdan amal qilishni boshlagan yangi tahrirdagi Yo‘l harakati qoidalari, shuningdek, yo‘l harakati xavfsizligini ta’minlash sohasida joriy etilayotgan o‘zgarishlardan aholini xabardor qilish bo‘yicha tadbirlar samaradorligini oshirish masalalari muhokama qilindi.
Tadbirning ikkinchi qismi yo‘l harakati xavfsizligini yaxshilashga qaratilgan amaliy choralarni amalga oshirish bo‘yicha xalqaro tajriba muhokamasiga bag‘ishlandi. Unda xalqaro ekspertlar Turkiya va Serbiya mamlakatlari misolida yo‘l harakatini tartibga solish masalalari haqida ma’lumot berdi.
Izoh (0)