Тошкентда 5 апрель, сешанба куни «Йўл ҳаракати хавфсизлигини таъминлаш бўйича тадбирлар самарадорлигини оширишда Ўзбекистонга кўмак» лойиҳаси доирасида давра суҳбати бўлиб ўтди. Тадбир Ўзбекистон Ички ишлар вазирлиги ҳамда Европада Хавфсизлик ва ҳамкорлик ташкилотининг Ўзбекистондаги ваколатхонаси томонидан ташкил этилди.

Тадбирда Олий Мажлис Қонунчилик палатаси, Вазирлар Маҳкамаси, Автомобиль ва дарё транспорти агентлиги, «Ўзавтойўл» давлат акциядорлик компанияси, Тошкент шаҳар ҳокимлиги ва бошқа манфаатдор ташкилотлар, шунингдек, ОАВ вакиллари қатнашди.

Давра суҳбатининг биринчи қисмида Ўзбекистонда 1 мартдан амал қилишни бошлаган янги таҳрирдаги Йўл ҳаракати қоидалари, шунингдек, йўл ҳаракати хавфсизлигини таъминлаш соҳасида жорий этилаётган ўзгаришлардан аҳолини хабардор қилиш бўйича тадбирлар самарадорлигини ошириш масалалари муҳокама қилинди.

Тадбирнинг иккинчи қисми йўл ҳаракати хавфсизлигини яхшилашга қаратилган амалий чораларни амалга ошириш бўйича халқаро тажриба муҳокамасига бағишланди. Унда халқаро экспертлар Туркия ва Сербия мамлакатлари мисолида йўл ҳаракатини тартибга солиш масалалари ҳақида маълумот берди.