Buyuk Britaniyaning Yevropa Ittifoqidan chiqishi “yo‘qlikka sakrash” bo‘lib, u turmush darajasiga salbiy ta’sir qiladi, ish o‘rinlarining kamayishiga sabab bo‘ladi, shuningdek, Yevropa bozoridagi savdo imkoniyatlarini cheklaydi. Bu haqda Buyuk Britaniya bosh vaziri Devid Kemeron The Daily Telegraph gazetasining elektron versiyasida chop etgan maqolasida ma’lum qildi, deb xabar beradi “TASS”.

“Yagona bozordan chiqish xizmat ko‘rsatish sohasiga jiddiy zarba beradi, aynan shu sohada iqtisodiyotimiz eng katta xatarga duch keladi”, — deb ta’kidladi Britaniya bosh vaziri mamlakatning kino ishlab chiqarish, reklama va sug‘urta tadbirkorligi bo‘yicha konsalting va auditorlik xizmatlarini taqdim etishdagi yetakchi roliga urg‘u berib.

“Xizmat ko‘rsatish sohasidagi tarmoqlarimiz yiliga o‘rtacha 3 foizga o‘smoqda va iqtisodiyotning deyarli 80 foizini tashkil etmoqda. Bunda uning 40 foizini Britaniya eksporti tashkil etib, bugungi kunda Yevropa eng yirik bozor hisoblanadi”, — dedi Kemeron.

U, shuningdek, yangi tahlillarga muvofiq ushbu sohadagi ish o‘rinlarining ikki millioni bevosita yoki bilvosita eksport bilan bog‘liq ekanligini ta’kidlab o‘tdi.