27-mart, yakshanba kuni Facebook’ning Rossiya, AQSh, Buyuk Britaniya va boshqa mamlakatlardagi foydalanuvchilari Lahordagi (Pokiston) portlashdan keyingi holatlari haqidagi ma’lumot bilan bo‘lishishlari so‘ralgan xabarni oldi. Bu haqda “Hi-Tech Mail.ru” ma’lum qildi.
Mazkur xabarni fojia ro‘y bergan joydan minglab kilometr uzoqda bo‘lganlar ham olgan va ular bundan xavotirga tushgan. Bunga manzilni aniqlash bilan bog‘liq adashuv sabab bo‘lgan ko‘rinadi.
Ijtimoiy tarmoqda Safety Check funksiyasi ishga tushirilgan bo‘lib, yirik hodisa ro‘y bergan joy atrofida bo‘lsangiz, yaqinlar va do‘stlarga siz haqingizda ma’lumot olishda yordam beradi. Gawker portaliga ko‘ra, ayni paytda xatoni o‘nglash yuzasidan ish olib borilmoqda, Facebook vakillari esa mazkur adashuv uchun uzr so‘ragan.
Eslatib o‘tamiz, 27-mart, yakshanba kuni Pokistonning Panjob viloyati poytaxti Lahor shahrida, Gulshani Iqbol bog‘idagi bolalar maydonchasida xudkush terrorchi o‘zini portlatib yuborishi oqibatida 72 kishi halok bo‘ldi, 300 dan ziyod kishi jarohat oldi.
Izoh (0)