Yevropa Ittifoqining Belarus va shaxsan mamlakat prezidenti Aleksandr Lukashenkoga qarshi ayrim sanksiyalarni bekor qilish to‘g‘risidagi qarori 27-fevral, shanba kunidan kuchga kirdi. Bu haqda YeIning rasmiy jurnalidagi xabarnomaga asoslanib, “RBK” yozmoqda.
Eslatib o‘tamiz, Yevropa Ittifoqi tashqi ishlar vazirlari kengashi Belarus prezidenti va 169 amaldorga nisbatan joriy qilingan sanksiyalarni to‘xtatishga qaror qilgan edi. Hozircha YeI davlatlariga kirishga qo‘yilgan taqiq hamda moliyaviy cheklovlar bekor qilindi.
Bundan tashqari, YeI Belarusning uch kompaniyasiga nisbatan amal qilib turgan cheklovlarni to‘xtatdi, lekin qurol-yarog‘ yetkazmalarini taqiqladi, shuningdek, to‘rt kompaniya hamda odamlarni olib qochishda gumondor to‘rt shaxsga nisbatan sanksiyalarni saqlab qoldi.
Inson huquqlari muntazam ravishda buzilgani tufayli Belarusga qarshi ilk sanksiyalar 1998-yilda joriy qilinib, ularning ro‘yxati yil sayin to‘ldirib borildi. 2008–2011-yillarda sanksiyalar vaqtinchalik to‘xtatilgan, ammo 2010-yilgi prezidentlik saylovlari bilan bog‘liq voqealar tufayli qaytadan amalga kiritilgan edi. O‘shanda saylov natijalaridan ko‘ngli to‘lmagan fuqarolar Minskda oxirgi yillardagi eng yirik norozilik aksiyasini o‘tkazgan, prezidentlikka barcha nomzodlar hibsga olingan, ayrimlari qamoq jazosiga hukm qilingan edi.
Izoh (0)