Kurd ekstremistik guruhi Anqarada sodir etilgan terakt uchun javobgarlikni o‘z zimmasiga oldi
“Kurdiston ozodligi qirg‘iylari” (TAK) ekstremistik guruhi Anqarada sodir etilgan portlash uchun javobgarlikni o‘z zimmasiga oldi. Reuters agentligiga asoslanib “Vedomosti”ining yozishicha, guruh Kurdiston ishchi partiyasi bilan aloqadorlikda gumon qilinadi.
17-fevral kechasi Anqara shahrida terrorchi harbiy konvoyga hujum uyushtirib, minalashtirilgan mashinani havoga uchirdi. Portlash parlament, bosh shtab va harbiy turarjoy yaqinida sodir etildi. Chorrahadagi svetofor oldida to‘xtab turgan, harbiy personalni olib ketayotgan transport kolonnasi nishonga olingan edi. Oqibatda 28 kishi halok bo‘ldi, shulardan 27 nafari harbiy xizmatchilar edi.
Jangari guruh tarqatgan bayonotga ko‘ra, terakt Turkiya janubi-sharqidagi “Jizradagi yerto‘lalarda yaralangan va vahshiylarcha o‘ldirilgan himoyasiz fuqarolar intiqomi” uchun amalga oshirilgan.
