28-yanvar, payshanba kuni Nyu-York fond birjasidagi savdolar ochilgandan keyin Facebook kompaniyasi aksiyalari narxi 107,95 dollarga oshdi. Bu bir kun oldingi savdolarning yopilishidagi ko‘rsatkichdan 14,3 foizga ko‘p deganidir, deb xabar beradi “RBK”.
Bu holat kompaniyaning 2015-yilning to‘rtinchi choragi va butun yil bo‘yicha faoliyati hisoboti natijalari e’lon qilingandan keyin ro‘y berdi.
Hujjatga ko‘ra, Facebook 2015-yilning oktabr—dekabr oylarida 1,56 milliard dollar daromad olgan. Bu 2014-yilning to‘rtinchi choragidagi 701 million dollar daromaddan ikki barobardan ham ko‘proq deganidir. Shunday qilib, Facebook’ning chorakdagi foydasi birinchi marta 1 milliard dollardan oshdi.
Butun 2015-yil davomidagi Facebook’ning daromadi 3,69 milliard dollarni tashkil etdi.
Izoh (0)