Suriya g‘arbidagi Rossiya bazasining minomyotdan o‘qqa tutilishi oqibatida shartnoma bo‘yicha xizmat qilayotgan to‘qqiz nafargacha rossiyalik harbiy oktabr oyida halok bo‘lgan. Bu haqda vaziyat bilan tanish uch manbaga tayanib, Wall Street Journal  ma’lum qildi, deya xabar beradi “RBK”.

Ma’lumotlarga ko‘ra, rossiyaliklar OSM xususiy harbiy guruhi a’zolari bo‘lgan. Rossiya janubida, Krasnodar o‘lkasida shakllantirilgan guruh Ukrainadagi harbiy harakatlarda ham ishtirok etgani, mingga yaqin a’zosi borligi aytilayotgan ushbu guruh minomyotdan o‘qqa tutilganidan so‘ng Suriyadan olib chiqib ketilgani bildirilmoqda.

Nashr manbalarining ta’kidlashicha, Rossiya rasmiylari harbiy xizmatchilar halok bo‘lganini tan olmagan. Rossiya mudofaa vazirligi esa OAVda paydo bo‘lgan xabarlarga izoh berishdan bosh tortgan.