Toshkent shahrida ko‘p qavatli uylarni qish mavsumiga tayyorlash uchun 10-oktabrgacha safarbarlik e’lon qilindi
Toshkent shahrida ko‘p qavatli uy-joylarni va ijtimoiy soha obyektlarini qish mavsumiga tayyorlash ishlarini yakunlash hamda hududlarning sanitar holatini yaxshilash va xazonrezgi mavsumiga tayyorgarlik ko‘rish bo‘yicha 10-sentabrdan 10-oktabrgacha safarbarlik e’lon qilindi. Bu haqda shahar hokimligi axborot xizmati xabar bermoqda.
Shahar hokimining 8-sentabrdagi farmoyishiga muvofiq, ko‘p qavatli uy-joy fondi hamda ijtimoiy soha obyektlari holati yana bir marotaba o‘rganilib, aholi tomonidan kelib tushgan murojaatlar asosida aniqlangan kamchilik va muammolarni joriy yilning 10-oktabrga qadar yakunlash belgilandi.
Xabar berishlaricha, ko‘p qavatli uy-joylarning tom va yerto‘la qismlari, kirish yo‘laklari holati, ijtimoiy soha muassasalarida issiqlikni saqlash bo‘yicha ahvol jamoatchilik komissiyalari tomonidan joyida ko‘rib chiqilib, jamoatchilik dalolatnomalari rasmiylashtiriladi.
“Shuni alohida ta’kidlash lozimki, qish mavsumining betalofat o‘tishida iste’molchilarning ko‘rsatilgan xizmatlar haqini o‘z vaqtida to‘lashlari muhim ahamiyatga ega”, — deyiladi shahar hokimligi axborot xizmati tomonidan tarqatilgan xabarnomada.
