Samsung ulkan yuk mashinalarini xavfsiz quvib o‘tish imkonini beruvchi tizim taklif etdi (video)

Samsung kompaniyasining Argentina bo‘limi yo‘llardagi eng xavfli harakatlardan biri — ulkan yuk mashinalarini quvib o‘tishda xavfsizlikni ta’minlash uchun juda oddiy, lekin bir paytning o‘zida ajoyib g‘oya taklif qildi, deb xabar bermoqda “Hi-News.ru”.

Tajriba sifatida Samsung o‘z yuk mashinalarining old qismiga kamera, orqasiga esa bir nechta ekran o‘rnatdi. The Safety Truck tizimida kameralar tushirgan tasvir real vaqt rejimida orqadagi ekranda namoyish etiladi va haydovchilar ulkan yuk mashinasining oldi bo‘shligi, shuningdek qarama-qarshi yo‘nalish ham bo‘shligiga amin bo‘lgan holda quvib o‘tish imkoniga ega bo‘ladi.

Qayd etilishicha, bu qanchalik yaxshi g‘oya bo‘lmasin, qo‘shimcha xarajatlar talab qilishi tufayli uni haqiqiy yo‘llarda amalga oshirish amri mahol. Holbuki, statistika bo‘yicha yo‘l-transport hodisalarining 80 foizi aynan quvib o‘tishdagi ehtiyotsizlik tufayli sodir bo‘ladi.