Ispaniyadagi A400M samolyoti halokatiga kompyuterdagi nosozlik sabab bo‘lgani xabar berildi

Airbus Military muhandislari Airbus A400M yangi harbiy transport samolyotining Ispaniyada halokatga uchrashi sababini aniqladi, deya xabar bermoqda “RIA Novosti”. U dvigatelni boshqarish blokining dasturiy ta’minotidagi muammo bilan bog‘liq.

Startdan so‘ng darhol dasturiy ta’minot ishdan chiqqan, natijada kompyuter samolyotning uchta dvigateliga turli buyruqlar bergan. Shu sababli dvigatellar o‘chib qolgan. Ekipaj bu jarayonga hech qanday ta’sir o‘tkaza olmagan.

Uchuvchilar samolyotni orqaga qayirib, uchish-qo‘nish yo‘lagiga qaytarmoqchi bo‘lgan, biroq bu foydasiz bo‘lib, mashina dalaga qulagan va deyarli butunlay yonib ketgan.

9-may kuni Ispaniyaning Sevilya viloyatida yuz bergan aviahalokat natijasida to‘rt kishi halok bo‘lgan, ekipajning yana ikki a’zosi og‘ir ahvolda shifoxonaga olib kelingan. So‘nggi ma’lumotlarga ko‘ra, samolyot bortida yetti kishi bo‘lgan.

Samolyot Airbus Military zavodida ishlab chiqarilgan va ayni vaqtda sinovdan o‘tkazilayotgan edi. Avvalroq Germaniya, Ispaniya, Buyuk Britaniya, Turkiya, Belgiya va Lyuksemburg 180 ta A400M’ni sotib olish istagini bildirgan edi, biroq hozirga qadar buyurtmachilarga birorta bunday samolyot yetkazib berilmagan.