Checheniston rahbari ma’muriyati boshlig‘i Magomed Daudov Rossiya qonunchiligida ko‘pxotinlilik qonuniylashtirilishini yoqlab chiqdi. Daudovning so‘zlariga ko‘ra, bunday amaliyot keng tarqalgan, shuning uchun uni tartibga solsa arziydi. Bu haqda Meduza.io xabar bermoqda.
Daudovning so‘zlariga ko‘ra, u Chechenistondagi tuman IIB boshlig‘i Najud Guchigovning yaqin tanishi hisoblanadi, shu sababli ham uning turmush o‘rtog‘i, 17 yoshli Luiza Goylabiyevani FHDYga olib kelgan.
“Men hozir deputat emasman, biroq ko‘pxotinlilikni qonuniylashtirishsa, yaxshi bo‘lardi. Lekin hammasi shariat bo‘yicha bo‘lishi shart: agar erkak yana bir ayolni ta’minlay olsa, nega bunga yo‘q deyish kerak? Axir bunday amaliyot keng tarqalgan, buni qandaydir yo‘l bilan tartibga solishsa, yomon bo‘lmaydi”, - dedi Daudov.
16-may kuni Checheniston poytaxti Grozniy shahrida 47 yoshli politsiyachi Najud Guchigov va 17 yoshli Luiza (Xedi) Goylabiyevaning to‘yi bo‘lib o‘tdi. “Novaya gazeta” ma’lumotlariga ko‘ra, Guchigovning hali ajrashmagan ikkinchi xotini bor edi. FHDYda ma’lum bo‘lganidek, Goylabiyeva katta yoshli politsiyachi uchun rasmiy birinchi xotin bo‘ldi, biroq to‘yda uning birinchi turmush o‘rtog‘i ham ishtirok etayotgani haqida xabar berildi.
Rossiya qonunchiligiga ko‘ra, bir vaqtning o‘zida ikki yoki undan ortiq nikohga kirish imkoni yo‘q. 18-may kuni Rossiya parlamenti quyi palatasining Oila, ayollar va bolalar masalalari bo‘yicha qo‘mitasi rahbari Yelena Mizulina Rossiya qonunchiligida ko‘pxotinlilik uchun jazo joriy etish zarur emas, deb hisoblashini ma’lum qildi.
Rus pravoslav cherkovi vakili Vsevolod Chaplinning so‘zlariga ko‘ra, ko‘pxotinlilik uchun jinoiy jazoni belgilash ham, ko‘pxotinlilikni qonuniylashtirish ham bir jinsli nikohlarni qonuniylashtirishdek bir xil ta’sirga ega va an’anaviy oilaning buzilishiga sabab bo‘ladi.
Izoh (0)