Toshkentdagi “Shodlik Palas” mehmonxonasida shaxmat bo‘yicha O‘zbekistonning birinchi grossmeysteri Georgiy Agzamov xotirasiga bag‘ishlangan xalqaro turnir yakunlandi. So‘nggi 9-tur uchrashuvlaridan so‘ng o‘z tarixida 9-marotaba o‘tkazilgan musobaqa g‘olibi aniqlandi, deb xabar bermoqda “Olamsport”.
So‘nggi tur natijalariga ko‘ra rossiyalik grossmeyster Vladislav Artemev hamda fransiyalik Vladislav Tkachev bir xil – 7 tadan ochko jamg‘arishdi. O‘zaro uchrashuvda bu ikki shaxmatchi durang o‘ynashgandi. G‘alabalar soni ham 5 tani tashkil etdi. Qo‘shimcha (perfomans 2687) ko‘rsatkichlariga ko‘ragina raqibidan birozgina ustun bo‘lgan Vladislav Artemev yakunda “Toshkent Open 2015” turniri g‘olibiga aylandi.
Yetakchilardan bir yo‘la 11 nafar ishtirokchi yarim ochko (6,5) kam jamg‘arishdi. Quvonarlisi, hamyurtimiz Bahodir Xolmirzayev (FM) qo‘shimcha ko‘rsatkichlarga ko‘ra sovrinli uchlikdan joy oldi.
Ayollar o‘rtasida eng yaxshi natijani terma jamoamiz a’zosi Sarvinoz Qurbonboyeva (WIM) qayd etdi. E’tiborga molik jihati shundaki, u xalqaro turnirda 6 ochko jamg‘ardi va ayol grossmeyster talabini ham bajardi. Ikkinchi o‘rin yana bir vakilamiz Bahora Abdusattorovaga (WFM) nasib etdi. Bahora 5,5 ochko to‘pladi. Kuchli uchlikka Maftuna Mamatkulova 5 ochko bilan yakun yasab berdi.
20 yoshgacha qizlar orasida g‘oliblik 5 ochko jamg‘argan Gulruhbegim Tohirjonovaga nasib etdi. 20 yoshgacha bo‘lgan o‘g‘il bolalar orasida O‘zbekiston terma jamoasi a’zolari Ortiq Nig‘matov va Alisher Bekmurotov g‘olib bo‘lishdi. Har ikki shaxmatchimiz 6 tadan ochko jamg‘arishdi.
Faxriylar o‘rtasida esa bosh sovrin tojikistonlik Nig‘mat Ziyayev tomonidan qo‘lga kiritildi. Peshqadam singari 5 ochko jamg‘argan hamyurtimiz Vladimir Yegin esa ikkinchi o‘rinni egalladi. Kuchli uchlikka rossiyalik grossmeyster Arkadiy Vul yakun yasab berdi.
Eslatib o‘tamiz, jami 76 nafar shaxmatchi qatnashgan xalqaro xotira turnirining umumiy mukofot jamg‘armasi 20 ming AQSh dollarini tashkil etdi. G‘olib shaxmatchi 4 ming dollarga ega bo‘ldi. Kuchli uchlikdan joy olgan shaxmatchilarga mos ravishda 3 va 2 ming dollardan mukofot puli taqdim etildi.
Izoh (0)