O‘zbekistonning 8 bokschisi xalqaro turnir finaliga yo‘llanma oldi

Bolgariya poytaxti Sofiya shahrida davom etayotgan boks bo‘yicha an’anaviy “Stranja” xalqaro turnirida finalchilar ma’lum bo‘ldi, deb xabar beradi “Olamsport.com”.

O‘z tarixida 66-bor tashkil etilgan mazkur xalqaro turnirda O‘zbekiston charm qo‘lqop ustalari ham o‘z imkoniyatlarini sinovdan o‘tkazyapti. Quvonarlisi, 27-fevral kuni ringga ko‘tarilgan O‘zbekiston bokschilaridan 8 nafari raqiblarini mag‘lub etib, finalga yo‘llanma oldi.

Kechagi kun bahslarini ham 49 kg vaznli bokschilar boshlab berdi. Ushbu vazn toifasidagi charm qo‘lqop ustasi Abdulla Qo‘chqorov armanistonlik Artur Oganesyanga qarshi ringga ko‘tarilib, raqibini 3:0 (29:28, 29:28, 30:26) hisobida taslim etdi.

52 kg vaznda ringga chiqayotgan Shahobiddin Zoirov mezbon bokschi Stefan Ivanovni 3:0 hisobida dog‘da qoldirdi. Hakamlar ikki bor 29:27 va 30:26 hisoblarida g‘alabani Shahobiddinga taqdim etdi.

56 kg vaznda ringga ko‘tarilayotgan Murodjon Ahmadaliyev ham g‘olibona yurishini davom ettirdi. U final ostonasida ukrainalik Yuriy Shestak bilan uchrashishi kerak edi. Lekin raqib ringga chiqmaganligi sababli Ahmadaliyev jangsiz finalga yo‘l oldi.

64 kg vazn toifasida O‘zbekiston sharafini himoya qilayotgan Fazliddin G‘oibnazarov turkiyalik Batuxan Gozgekdan 2:1 (28:29, 29:28, 30:27) hisobida dog‘da qoldirdi.

69 kg vazndagi O‘zbekiston terma jamoasi a’zosi Isroil Madrimov ukrainalik Yaroslav Samofalovga 1:2 hisobida yutqazib qo‘ydi. Angliya va braziliyalik hakamlar mos ravishda 30:27 hamda 29:28 hisobida g‘alabani ukrain bokschisiga taqdim etdi. Chexiyalik hakam esa 29:28 hisobida Madrimov zafar quchganligini ma’lum qildi.

75 kg vazn toifasida ringga ko‘tarilayotgan Nankin o‘smirlar Olimpiya o‘yinlari g‘olibi Bektemir Meliqo‘ziyev ham finalga chiqdi. U ukrainalik Valeriy Xarlamovdan 3:0 (30:25, 30:26, 30:27) hisobida ustun keldi.

81 kg vazn toifasida qatnashayotgan tajribali bokschi Elshod Rasulov ham g‘alabaga erishdi. U gruziyalik Nikoloz Shexniashvilidan 2:1 (28:29, 29:28, 30:27) hisobida ustun keldi.

91 kg vazn toifasidagi Rustam To‘laganov gruziyalik Levan Guledani bilan hisob-kitob qildi va raqibini 3:0 (30:25, 30:27, 30:27) hisobida taslim etdi.

Eng og‘ir +91 kg vazn toifasidagi bokschi ham final ishtirokchisiga aylandi. Bahodir Jalolov bolgariyalik Petar Belberovdan 3:0 (29:27, 30:26, 29:27) hisobida ustun keldi.