Jurnalistika sohasida “Oltin qalam” X Milliy mukofoti uchun xalqaro tanlovga tayyorgarlik ko‘rish va uni o‘tkazish bo‘yicha tashkiliy qo‘mitaning yig‘ilishi bo‘lib o‘tdi. Bu haqda O‘zbekiston Milliy axborot agentligi xabar bermoqda.
O‘zbekiston Jurnalistlari ijodiy uyushmasi raisi I. Halimbekov, Kasaba uyushmalari federatsiyasi kengashi raisi T. Norboyeva, madaniyat va sport ishlari vaziri o‘rinbosari D. Mullajonov, Mustaqil bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondi direktori A. Abdullayev, O‘zbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash jamoat fondi direktori A. To‘rayev, YuNESKOning O‘zbekistondagi vakolatxonasi rahbari K. Pikkat va boshqalar Prezident Islom Karimov rahnamoligida O‘zbekistonda ommaviy axborot vositalarini izchil rivojlantirish borasidagi sa’y-harakatlar demokratik islohotlarning muhim qismini tashkil etayotganini ta’kidladi.
O‘zbekiston Jurnalistlari ijodiy uyushmasi va Jurnalistlarni qayta tayyorlash markazi tomonidan O‘zbekiston elektron ommaviy axborot vositalari milliy assotsiatsiyasi, Mustaqil bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondi, Milliy teleradiokompaniya, “Uzreport” axborot agentligi, Madaniyat va sport ishlari vazirligi, O‘zbekiston Kasaba uyushmalari federatsiyasi kengashi hamkorligida o‘tkazilayotgan ushbu tanlov televideniye, radio, matbuot va internet-jurnalistika yo‘nalishlari bo‘yicha eng faol ijodkorlarni qo‘llab-quvvatlashda muhim ahamiyat kasb etmoqda. Unda o‘n uchta – bitta bosh milliy mukofot, har bir yo‘nalish bo‘yicha uchtadan mukofot ta’sis etilgan.
Bu yilgi tanlovning o‘ziga xos jihati – asosiy mukofotlar qatoriga “Eng yaxshi matbuot xizmati” va “Eng yaxshi fotoreportaj uchun” rag‘batlantiruvchi nominatsiyalari ham qo‘shildi.
“Oltin qalam” tanlovi g‘oliblarini mukofotlash hamda uni o‘tkazish bilan bog‘liq sarf-xarajatlar O‘zbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash jamoat fondi tomonidan moliyalashtiriladi. An’anaga ko‘ra, BMT, YuNESKO, YeXHT, Jahon banki, “Mintaqaviy muloqot” (Sloveniya) kabi bir qator xalqaro tashkilotlarning O‘zbekistondagi vakolatxonalari o‘z mukofotlari bilan qatnashadi.
Tanlov g‘oliblari Jahon matbuoti erkinligi kuni arafasida e’lon qilinadi.
Izoh (0)