Murod Ismoilov: Bosh maqsadimiz — “Neftchi”ning avvalgi mavqeini tiklash
Farg‘onaning “Neftchi” jamoasi yangi mavsumga tayyorgarlikning 3-bosqichini o‘z qarorgohida boshladi. Murod Ismoilov shogirdlari yaqindagina Toshkentda tashkil etilgan o‘quv-mashg‘ulotlar yig‘inini yakunlab, Farg‘onaga qaytgandi, deb xabar bermoqda “Uff.uz”.
Farg‘onaliklar poytaxtdagi yig‘in davomida bir nechta nazorat uchrashuvlarida ham maydonga tushdi. Jumladan, “Obod”, “Olmaliq” va “So‘g‘diyona” jamoalari mag‘lubiyatga uchratildi. “So‘g‘diyona”ga qarshi kechgan o‘rtoqlik o‘yinidan so‘ng “Neftchi” bosh murabbiyi o‘z fikrlari bilan o‘rtoqlashdi.
— Mavsumga tayyorgarlik ishlari ko‘ngildagidek davom etyaptimi?
— Rejaga muvofiq, yangi mavsumga tayyorgarlik jarayonini 10-dekabr kuni Farg‘onada boshlagan edik. Yangi yilgacha o‘z qarorgohimizda shug‘ullandik. Bayram tufayli yigitlarga qisqa muddatli ta’til berdik va shundan so‘ng yana 10 kun mobaynida o‘zimizda mashg‘ulot o‘tkazdik. 14-yanvardan esa yig‘inimiz Toshkentga ko‘chdi. Poytaxtda 4 ta nazorat uchrashuvi o‘tkazdik. Shulardan “Olmaliq”, “So‘g‘diyona” va “Sho‘rtan”ga qarshi o‘yinlar “Chilonzor” sun’iy qoplamali maydonida bo‘ldi.
Jamoamiz joylashgan mehmonxona shu yerga yaqinligi uchun ham aynan “Chilonzor” stadionida shug‘ullandik. Endi Farg‘onaga qaytamiz va an’anaviy tarzda o‘tkazib kelinayotgan “Hokim kubogi” turnirida ishtirok etamiz. 10-fevraldan esa tayyorgarlikning 5-bosqichini Turkiyada davom ettirishni rejalashtirganmiz. Antaliyada 4 ta nazorat uchrashuvida maydonga tushamiz. Raqiblar bilan o‘yin sanalarini ham aniqlab olganmiz. Gruziya va Makedoniya oliy ligasi klublari, shuningdek, Samaraning “Krilya Sovetov” hamda Zaporojening “Metallurg” jamoalari bilan kuch sinashib ko‘ramiz.
— Tabiiyki, mavsumlar oralig‘ida yangi futbolchilar sinovdan o‘tkaziladi. “Neftchi” jamoasida bu jarayon qanday davom etyapti?
— Bu yil shov-shuv ko‘tarib, nomdor futbolchilarni jamoaga taklif qilolmadik. Lekin vaziyatdan kelib chiqqan holda o‘zim tarkibda ko‘rishni istagan o‘yinchilarni mashg‘ulotlarimizga jalb qildik, deya olaman. Bir necha yil “Neftchi” sharafini himoya qilib, o‘tgan mavsumlar o‘z omadini boshqa klublarda sinab ko‘rgan Mansur Saidov, Baxtiyor Yoqubov, Shukurali Po‘latov, Oybek Nurboyev kabi tajribali yigitlarni ortga qaytardik. “Paxtakor”dan Abbos Maxstaliyev va Muhsin Ubaydullayevni yig‘inga chaqirganman. O‘zbekiston olimpiya terma jamoasiga nomzod bu futbolchilarga o‘yin amaliyoti kerak. Ular bilan shartnoma imzoladik. Bundan tashqari, darvozabon Yevgeniy Cheremisin bilan kelishuvga erishishga yaqin turibmiz. U nazorat o‘yinlarida yaxshi taassurot qoldirdi. Tajribali Akmal Xolmatov ham yangi mavsumga biz bilan birga taraddud ko‘ryapti.
— Mahalliy yoshlarni kashf etish, o‘rinbosarlar safidan asosiy tarkibga iste’dodli futbolchilarni jalb qilish bo‘yicha qanday ishlar olib borilyapti?
— Ko‘p yillar Farg‘ona futboliga xizmat qilgan Bahrom Haydarov o‘rinbosarlar jamoasi bilan shug‘ullanyapti. Hozir asosiy urg‘uni 1996—1998-yillarda tug‘ilgan yoshlarga qaratyapmiz. O‘tgan yillar davomida farg‘onalik iste’dodli futbolchilar boshqa klublarga o‘tib ketdi. Ular vaqtida ushlab qolinmagan. Masalan, Abdulloh Olimov, Muhsin Ubaydullayev kabi yigitlarimizni ham ijara asosida olishga majburmiz. Ayni payt Bahrom Haydarov yoshlar bilan jiddiy ishlayapti. Yoshlarimiz jamoa bazasida kuniga 2 mahal mashg‘ulot o‘tkazyapti.
— Yangi mavsumni yangi stadionda qarshi olasiz. 14-mart kuniga stadionning ochilish marosimi belgilangan. Umuman, jamoa muxlislari “Neftchi”dan avvalgidek yorqin o‘yinlar kutsa bo‘ladimi?
— O‘zbekistonning eng sovrindor jamoalaridan biri hisoblangan “Neftchi”dan har yili mazmunli o‘yin kutishadi. O‘z navbatida, biz ham, albatta, muxlislarni xushnud etishga astoydil harakat qilamiz. O‘tgan mavsum boshlanishida natijamiz avvalgi yildagidan yaxshiroq bo‘lishini aytgan ekanman, javob berish qiyin bo‘ldi. Shu bois, oldindan aniq va’da bermaymanu, lekin jamoa rahbariyati va muxlislarimizni o‘z o‘yinlarimiz va natijalarimiz bilan mamnun etamiz, deb o‘ylayman.
— Oliy ligada 16 ta jamoa ishtirok etishiga munosabatingiz qanday?
— Kurash qiziqarli tus olishini taxmin qilyapman. Jamoalar o‘z holatlaridan kelib chiqqan holda tayyorgarlik ko‘ryapti. Menimcha, ishtirokchilar sonining 16 taga yetkazilgani yaxshi. Zero, 26 ta o‘yin bir yil uchun juda oz edi. Endi jamoalar 24-milliy chempionatimizda qanday qatnashadi — buni vaqt ko‘rsatadi. Har bir klubning o‘z oldiga qo‘ygan maqsadi bor. O‘zimizga kelsak, “Neftchi”ning avvalgi mavqeini tiklashni maqsad qilganmiz. To‘g‘ri, buni bir yilda amalga oshirish mushkul. Ammo yildan-yilga shunga qarab boramiz.
