Mayami (AQSh)da KONKAKAF (Shimoliy va Markaziy Amerika hamda Karib dengizi mamlakatlari) mintaqasida 2018-yilgi jahon chempionati saralash bosqichining dastlabki ikki raundiga qur’a tashlandi, deb xabar qiladi “Stadion.uz” “Euro-football.ru”ga tayanib.
Birinchi raundda quyidagi jamoalar o‘zaro bahslashadi:
- Bagam orollari — Bermud orollari
- Britaniya Virginiya orollari — Dominika
- Barbados — Amerika Virginiya orollari
- Terks va Kaykos — Sent-Kits va Nevis
- Nikaragua — Angilya
- Beliz — Kayman orollari
- Kyurasao — Montserrat.
- Sent-Vinsent va Grenadina — Gayana
- Antigua va Barbuda — Sent-Lyusiya
- Puerto- Riko — Grenada
KONKAKAFda Rossiyadagi musobaqa uchun 35 jamoa kurash olib boradi. Bu mintaqadan 3 jamoa JChga to‘g‘ridan-to‘g‘ri yo‘l oladi, yana bir terma jamoa esa qit’alararo pley-off bahsida maydonga chiqadi.
KONKAKAFda saralash bosqichi 5 raunddan iborat. Birinchi bosqichdagi o‘yinlar 23 va 31-mart kunlari bo‘lib o‘tadi. Ikkinchi raund bahslari iyunda o‘tkaziladi, avgust—sentabrda uchinchi raund o‘yinlari o‘tkaziladi. 2015-yil noyabridan boshlab 4-bosqich boshlanadi. Unda JCh—2014 ishtirokchilari — Kosta-Rika, Meksika, AQSh va Gonduras, yana Panama hamda Trinidad va Tobago ham qatnashadi. 12 jamoa uch guruhga bo‘linadi, ular orasida eng kuchli 6 jamoa so‘nggi bosqichga yo‘l oladi. 5-raund uchrashuvlari 2016—2017-yillarda o‘tkazilishi rejalashtirilgan.
Osiyoda saralashning dastlabki o‘yinlari 12-mart kuni bo‘lib o‘tadi. Qur’a tashlash marosimi esa fevralda o‘tkazilishi kerak. Okeaniya mintaqasida jahon chempionati — 2018ga saralash bosqichi mintaqaviy Millatlar Kubogi yakunlariga ko‘ra aniqlanadi. Avgustda boshlanadigan turnir g‘olibi qit’alararo pley-off bosqichi va Konfederatsiyalar Kubogi — 2017 da ishtirok etish huquqini qo‘lga kiritadi.
Yevropa va Afrikadagi saralash o‘yinlariga 25-iyul kuni Sankt-Peterburgda qur’a tashlanadi. Shu yerda Janubiy Amerikadagi turnir kalendari ham tasdiqlanadi. Janubiy Amerika va Afrikada saralash bosqichi shu yilning kuzida boshlanadi. Yevropada esa 2016-yilning kuzida start oladi.
JCh—2018 o‘yinlari 14-iyundan 15-iyulgacha Rossiyaning 11 shahridagi 12 ta stadionda bo‘lib o‘tadi.
Izoh (0)