Hali Osiyo kubogi boshlanmagan bo‘lsa ham Janubiy Koreya sport jamoatchiligi “A” guruhidan Avstraliya va o‘z terma jamoalari, “B” guruhidan esa O‘zbekiston va Saudiya Arabistoni terma jamoalari keyingi bosqichga chiqishini katta ishonch bilan taxmin qilmoqda. Shu bilan birgalikda chorak finaldagi “janglar”ga oid fikr-mulohazalar ham uzilmayapti, deb xabar beradi “Stadion.uz”.
Jumladan, bugun, 8-yanvar kuni Janubiy Koreyaning nufuzli OSEN nashri Osiyo kubogi bahslari haqida maqola e’lon qilar ekan, O‘zbekiston terma jamoasi ishtirok etadigan “B” guruhida Xitoy va Shimoliy Koreya terma jamoalarini guruh autsayderlari sifatida qayd etgan. O‘zbekiston terma jamoasi haqida fikr yuritarkan, OSEN nashri shunday yozadi:
“O‘zbekiston terma jamoasi o‘tgan jahon chempionatiga chiqa olmagan bo‘lsa ham saralash bosqichida ‘so‘nggi nafasi qolguncha’ bizning terma jamoamizni ta’qib etdi. O‘tgan 2011-yilgi Osiyo Kubogida esa yarim finalga qadar yetib kelgan ushbu terma jamoa so‘nggi o‘rtoqlik o‘yinlarida ketma-ket g‘alabalarga erishdi. O‘zbeklar jamoasiga koreyalik futbol muxlislariga yaxshi tanish Server Jeparov sardorlik qiladi. Jeparov siz-u biz o‘ylagandan ham buyuk futbolchi hisoblanadi. Agar chorak finalda O‘zbekiston — Janubiy Koreya juftligi hosil bo‘lsa, key-ligada to‘p tepgan Jeparov va uning jamoadoshlari to‘sig‘idan o‘tish ancha muammoga aylanadi. O‘zbekistonga to‘qnash kelmaslik — eng ma’qulidir. Biz uchun Saudiya Arabistoni har tomonlama qulay raqib!”.
Koreys nashrlari fikricha, 18-yanvar kuni O‘zbekiston va Saudiya Arabistoni terma jamoalari o‘rtaga guruh g‘olibligini qo‘yib kurashadi. Xitoy va Shimoliy Koreya esa o‘zbek va arab jamoalariga ketma-ket g‘alaba tuhfa etadi.
“Chunki Xitoy tarkibida birorta ham jamoani ortidan ergashtiradigan, o‘yinni hal qila oladigan futbolchi yo‘q. Shu tufayli jamoa guruhdan chiqishi qiyin ko‘rinyapti. Shimoliy Koreya esa Incheondagi Osiyo o‘yinlari futbol musobaqasi finaliga chiqqan bo‘lsa ham Chong Te Se (‘Suvon’, Janubiy Koreya) va Xong Yong Jo (‘Rostov’, Rossiya) kabi tajribali futbolchilarning tarkibdan chetda qolishi va yaqindagina yangi murabbiyning ish boshlaganligi kabi omillar sabab guruhda favorit emas”.
Izoh (0)