Qishki ta’til davrida − 5 va 6-yanvar kunlari “Istiqlol” san’at saroyida “Masha va ayiq” multfilmi asosida sahnalashtirilgan shu nomli bolalar yangi yil tomoshasi bo‘lib o‘tdi. Bu haqda tadbir tashkilotchilari “Daryo”ga ma’lum qildi.
Ushbu tabdir Art Uz Promotion MChJ tomonidan tashkil etilgan bo’lib, ushbu tashkilotga multfilm qahramonlari obrazini ishlatish uchun ekslyuziv huquq multfilmga daxldor mualliflik huquqlariga egalik qiluvchi Rossiyaning “Masha i medved” kompaniyasi tomonidan taqdim etilgan.
Shuni ta’kidlab o’tish joizki, ushbu sahna ko’rinishining syujeti aynan “Masha i medved” kompaniyasi tomonidan tasdiqlangan bo’lib, unda bosh qahramonlar Masha va Ayiq, an’anaviy Qorbobo va Qorqizdan tashqari muhlislar qarshisida halqimiz uchun sevimli bo’lgan Shumbola obrazi ham namoyon bo‘ldi.
Masha, Ayiq va Shumbolaning yangi yil sarguzashtlari haqidagi sahnalashtirilgan etrakni yaratish ustida O‘zbekistonda xizmat ko‘rsatgan artist Malika Iskanderova va O‘zbekiston yoshlar teatri aktyori Bobur Yo‘ldoshev ishladilar. Rollarni teatrlarimizning ko‘zga ko‘ringan aktyorlari ijro etdilar
Sahna ko‘rinishi 3 yoshdan 12 yoshgacha bo‘lgan bolalar uchun mo‘ljallangan bo‘lib, hatto ularning ota-onalariga ham manzur bo‘ldi. Ushbu tomosha kattalar va bolalar uchun sevimli bo‘lib qolgan multfilmga monand ravishda taqdim etildi va ushbu multfilmdagi musiqa va multfilm mualliflari tomonidan taqdim etilgan liboslar tadbirga o‘ziga xos joziba baxsh etdi.
Shu bilan birga tadbirni sahnalashtirishda o‘zbek mumtoz musiqasi, milliy qo‘shiqlar va milliy liboslardan foydalanilgani ham barchani e’tiborini jalb etdi.
Qorbobo tomonidan tayyorlangan maxsus yangi yil sovg‘asi esa tadbirning eng yuqori nuqtasi bo‘ldi – namoyish so‘ngida yosh tomoshabinlar uchun “Masha i medved” kompaniyasi tomonidan maxsus taqdim etilgan “Masha va Ayiq” multfilmining yangi seriyasining ilk namoyish bo‘lib o‘tdi.
Izoh (0)