Gollivud aktrisasi Kemeron Dias 5-yanvar, dushanba kuni o‘z sevgilisi — musiqachi Benjamin Meddenga turmushga chiqdi. Bu haqda US Weekly nashriga tayanib, “TASS” xabar berdi.
Nikoh marosimi Diasning Los Anjelesdagi nufuzli Beverli-Xillz tumanida joylashgan uyida bo‘lib o‘tdi. Unda Riz Uizerspun, Gvinet Peltrou va boshqalar mehmon sifatida qatmashgan bo‘lsa, Nikol Richchi, Dryu Berrimor, Diasning singlisi Chimen kelin dugonalari bo‘ldi.
Ushbu nikoh 42 yoshli Dias uchun ham, 35 yoshli Medden uchun ham birinchisidir. Juftlik 2014-yilning mayida uchrasha boshlagan, 19-dekabrda esa unashtirilgan edi.
Benji Medden Amerikadagi mashhur Good Charlotte guruhining bek-vokalistidir. Kemeron Dias esa “Jon Malkovich bo‘lish”, “Charli farishtalari”, “Vanilli osmon”, “Ta’tillar almashganda” kabi filmlardagi rollari orqali taniqlidir.
Izoh (0)