2012-yil 19-dekabrda qabul qilingan “Saylov erkinligi yanada ta’minlanishi va saylov qonunchiligi yanada rivojlantirilishi munosabati bilan ‘O‘zbekiston Respublikasi Oliy Majlisiga saylov to‘g‘risida’gi hamda ‘Xalq deputatlari viloyat, tuman va shahar Kengashlariga saylov to‘g‘risida’gi O‘zbekiston Respublikasi qonunlariga o‘zgartish va qo‘shimchalar kiritish haqida”gi qonun saylovlarni yanada liberallashtirish, ularning ochiqligini ta’minlash, fuqarolarning o‘z xohish-irodalarini erkin va mustaqil bildirishi uchun yanada qulay shart-sharoit yaratdi. Bu haqda O‘zbekiston Milliy axborot agentligi ma’lum qildi.
Ma’lumki, saylov natijasida saylovoldi tashviqoti muhim o‘rin tutadi. Saylovoldi tashviqoti to‘laqonli o‘tkazilsa, saylovchi o‘z nuqtai nazarini belgilashga qiynalmaydi.
Yuqorida qayd etilgan qonunda saylovoldi tashviqoti bilan bog‘liq masalalarga keng o‘rin berilgani, uning turlari, shakllari, usullari aniq bayon etilgani bu yilgi saylovga tayyorgarlik jarayonining yuqori saviyada, demokratik talablar asosida o‘tkazilishiga yo‘l ochdi.
Qonunda mustahkamlab qo‘yilganidek, saylovoldi tashviqoti – saylov kampaniyasi davrida amalga oshiriladigan va saylovchilarni deputatlikka nomzodni yoki siyosiy partiyani yoqlab ovoz berishga undashga qaratilgan faoliyatdir. Bu jarayon Oliy Majlis Qonunchilik palatasi deputatligiga nomzodlar Markaziy saylov komissiyasi tomonidan ro‘yxatga olingan kundan e’tiboran, ya’ni 2014-yil 15-noyabrda boshlangan edi.
Saylovoldi tashviqotini ommaviy axborot vositalari orqali olib borish qonunga muvofiq tashkil etildi. Bu borada deputatlikka nomzodlar, siyosiy partiyalarga hajmiga ko‘ra bir xil bo‘lgan efir vaqti va bosma nashr maydonini bepul berish yo‘li bilan teng sharoitlar ta’minlandi.
Saylovoldi tashviqoti saylovchilar bilan uchrashuvlar o‘tkazish, bosma, ko‘rgazmali, audiovizual va boshqa tashviqot materiallarini chiqarish hamda tarqatish orqali ham olib borildi. Bu jarayonlarda ham saylov ishtirokchilariga teng sharoitlar yaratildi.
Qonunga ko‘ra, saylov kuni va ovoz berish boshlanishiga bir kun qolganda saylovoldi tashviqotiga yo‘l qo‘yilmaydi. Shunga ko‘ra, 19-dekabrda saylov bilan bog‘liq tashviqot ishlari yakuniga yetdi. 20-dekabr kuni, ya’ni saylovga bir kun qolganda saylovoldi tashviqotlari olib borilmaydi.
Bunday normaning qonunchiligimizga kiritilgani saylovchilarga o‘z qarashlarini, siyosiy xayrixohligini aniqlab olish, kim va qanday siyosiy partiya va uning nomzodi uchun ovoz berish masalasida aniq bir qarorga kelishi uchun qo‘shimcha imkoniyat yaratadi. Shuningdek, bu ovoz berish kuni arafasida turli suiiste’mollik holatlari va qonunbuzilishlarning oldini oladi.
Qisqacha aytganda, milliy saylov qonunchiligimizdagi normalar saylov kampaniyasi mobaynida siyosiy partiyalarga va deputatlikka nomzodlarga teng shart-sharoitlar yaratish bilan birga, fuqarolarga o‘z saylov huquqlarini erkin amalga oshirishi uchun ham muhim huquqiy kafolat bo‘lmoqda.
Izoh (0)