Mirjalol Qosimov: Maqsad – Osiyo kubogida sovrinli o‘rinni egallash
O‘zbekiston milliy terma jamoasining BAAda o‘tkazgan birinchi yig‘inidan so‘ng Toshkentga qisqa safari davomida “Sports.uz” muxbiri termamizning tayyorgarliklari va BAAda o‘tkaziladigan navbatdagi yig‘in xususida bosh murabbiy Mirjalol Qosimov bilan suhbatlashdi, deb xabar bermoqda “Stadion.uz”.
“Milliy chempionat o‘yinlari noyabr oyida yakunlandi va futbolchilar ta’tilga chiqishdi. Qisqa ta’tildan so‘ng biz Osiyo kubogiga tayyorgarlikka kirishdik. Xabaringiz bor, 24-noyabrdan Toshkentda dastlabki yig‘in boshlandi. Bu bir haftalik yig‘inimiz qaysidir ma’noda tiklanish bo‘ldi. 1-dekabrdan 14-dekabrgacha bo‘lgan vaqt oralig‘ida BAA o‘quv-yig‘in mashg‘ulotlarini o‘tkazdik. Bu yig‘inda biz ko‘proq jismoniy tayyorgarlikka e’tibor qaratdik. Chunki, bizda yanvar bo‘lishiga qaramay Avstraliyada yoz bo‘ladi. Bu esa jismoniy faol fasldir. Issiq havoda futbolchilar chidamlilik talab etiladi. Bizning futbolchilar ham shunga mos ravishda o‘z imkoniyatlarini yuqori darajaga olib chiqishlari zarur. Shu sababli kuniga ikki mahaldan, ertalab va kechqurun mashg‘ulotlar o‘tkazdik. Qumda, trenajyor zalida va maydonda mashqlar bajardik.
Biz BAAdagi bu yig‘inimizda ikkita o‘rtoqlik uchrashuvi o‘tkazdik. Bular – Yangi Zelandiyaning “Oklend Siti” klubi va Falastin terma jamoalari bilan o‘yinlardir. Bu uchrashuvlar bizning jamoa sifatida shakllanishimiz uchun zarur edi. Natija bunday uchrashuvlarda muhim emas. Biz biroz boshqacha o‘yin usullarini, taktik sxemalarni ham qo‘llab ko‘rdik. Mana, Braziliyada o‘tgan oxirgi jahon chempionatida ham ko‘rdikki, ko‘plab terma jamoalar 5-4-1 taktik sxemasidan foydalanishdi. Buning samaradorligi qanchalik ekanini bu o‘yinlarda sinab ko‘rdik. Bu Avstraliyadagi o‘yinlarda asqotishi mumkin. Shuningdek, futbolchilarning jismoniy tayyorgarligi muhim bo‘lgani bois bu jamoalar bilan o‘yinga maxsus tayyorgarlik ko‘rganimiz yo‘q. Futbolchilar biroz charchoq holatida maydonga tushishdi.
Ikkinchi yig‘inda uchta o‘rtoqlik uchrashuvi — Iordaniya bilan va Iroq termasi bilan ikkita o‘yin rejada bor. Bilasizmi, BAAdagi dastlabki yig‘inimizda ayrim legionerlarimiz o‘z milliy chempionatlaridagi o‘yinlari sabab ishtirok eta olishmadi. Endigi safar ularning barchasi safimizda bo‘ladi. Bular — Vitaliy Denisov, Aziz Haydarov, Sanjar Tursunov, Bahodir Nasimov, Odil Ahmedov. Ushbu futbolchilar ikkinchi yig‘inga qo‘shilishadi va Osiyo kubogi oldidan futbolchilar bir-birlarini yanada yaqin tushunib olishadi, degan umiddaman. 21-dekabrda Iordaniya, 25 va 28-dekabrda Iroq bilan o‘yinlar bo‘ladi. Afsuski, biz boshqa sparring-raqiblar topa olmadik. Ikkinchi yig‘indagi asosiy maqsadimiz o‘yinni shakllantirishdir.
Futbolda avlodlar almashinuvi hamma vaqt bo‘lib kelgan. Yoshlar keladi va tajribali futbolchilar yonida pishib yetiladi, kattalar esa jamoani tark etadi. Bu yil ham milliy terma jamoa safiga jalb qilingan futbolchilardan Jamshid Iskandarov, Sardor Rashidov, Bobur Yo‘ldoshev, Igor Sergeyev, Eldorbek Suyunov kabilar o‘z o‘yinlarini topib ulgurishdi. Bularning kelajagi porloq. Ular o‘z ustida ishlashda davom etishlari lozim. Asta-sekinlik bilan ularga imkon berib, terma jamoa o‘yiniga salbiy ta’sir o‘tkazmasdan yoshlarni tarkibga jalb qilmoqdamiz. O‘ylaymanki, bu kabi yoshlar Osiyo kubogida milliy terma jamoamizning o‘yiniga o‘z hissasini qo‘shishadi. Men hech qachon birgina futbolchiga ishonib qolmaganman. Futbol bu – jamoaviy o‘yin. Shu sababli ularning jamoaviy ruhini ko‘tarish, futbolchilarning yuragida Vatan hissini o‘yg‘otish kerak. Har bir mashg‘ulotda biz shunga e’tibor qaratmoqdamiz.
Aslida Osiyo kubogida ishtirok etadigan jamoalarning birortasini kuchsiz deb bo‘lmaydi. Biz ham raqiblarni o‘rganyapmiz, ular ham bizni o‘rganishmoqda. O‘zim Shimoliy Koreyaning o‘yinini ko‘rib, kuzatib keldim. Yordamchim Baxtiyor Ashurmatov ham “Ko‘rfaz kubogi” turnirida bo‘lib Saudiya Arabistoni termasining o‘yinlarini kuzatib, disklarini olib keldi. Barcha raqiblarimiz haqida ma’lumotlar to‘plab, o‘rganib bormoqdamiz. Bizning guruhimizga qaytadigan bo‘lsak, Saudiya Arabistoni, Shimoliy Koreya va Xitoy futboli keyingi yillarda ancha rivojlandi. Biz ham qarab turganimiz yo‘q. Biz ulardan kuchlimiz va guruhdan chiqishimiz lozim.
Maqsad – sovrinli o‘rinni egallash. Albatta, biz buni juda qattiq istaymiz. O‘FF prezidenti M. Usmonov tomonidan buning uchun bizga barcha sharoitlar yaratib berildi. Biz bu imkoniyatdan foydalangan holda o‘zimizning yaxshi o‘yinimiz va natijalarimiz bilan javob berishimiz kerak. Muxlislarimiz buni anchadan beri orziqib kutishdi. Biz ham ularni xursand qilish uchun bor kuchimizni beramiz.
Muxlislarimizning terma jamoamiz g‘alabasini qanchalik istayotganini biz ham tushunib turibmiz. Shuni aytishim kerakki, ular agarda buni bir marta istasa biz o‘n chandon ortiq istaymiz. Hozir jamoada ana shunday muhit shakllangan. Futbolchilar Vatan oldida, muxlislar oldida faqat g‘alaba qozonishni istashadi. Biz buning uchun borimizni beramiz”, − dedi Qosimov.
