Oksfordning sobiq yepiskopi − lord Richard Xarris Buyuk Britaniya monarxlarining toj kiydirish marosimlarida Qur’on o‘qishni taklif qildi, deb xabar bermoqda The Daily Mail.
Uning so‘zlariga ko‘ra, bu marosimning mehmondo‘stlik kayfiyatini oshiradi. Sobiq yepiskop misol sifatida Bristol soborini keltirgan. Islomga e’tiqod qiluvchi shahar meri va graflik sherifi ishtirok etgan marosimlardan birida bu yerda Injil bilan birgalikda Qur’on ham o‘qilgan. Lord Xarris ushbu taklifi uchun tanqid ostida qolgani ma’lum qilingan.
Qayd etilishicha, musulmonlar Buyuk Britaniya aholisining 5 foizini tashkil etadi, bu 3 million kishiga yaqin demakdir. Musulmonlar mamlakatda tobora faol siyosiy kuchga aylanib bormoqda, har bir partiya ularning ko‘magiga tayanishni istaydi.
Buyuk Britaniyada navbatdagi toj kiydirish marosimi qachon o‘tkazilishi ma’lum emas. Hozirgi davlat rahbari − Qirolicha Yelizaveta II 1953-yilda taxtga o‘tirgan bo‘lsa, uning to‘ng‘ich o‘g‘li − Shahzoda Charlz amaldagi valiahd hisoblanadi.
Izoh (0)