Norvegiya o‘z tarixida birinchi marta radiatsiya va yadro xavfsizligini ta’minlash bo‘yicha milliy strategiyani taqdim etdi. Mamlakat hukumatining xabar berishicha, strategiyaning asosiy maqsadi aholining sog‘lig‘ini saqlash va atrof-muhitni muhofaza qilishdan iborat.
“Mamlakatimizda radiatsiya va yadro xavfsizligi sohasida birinchi milliy strategiya paydo bo‘lganidan juda mamnunman. U mamlakatimizning sog‘liqni saqlash sohasidagi tayyorgarligini va xavfsizligini mustahkamlashga qaratilgan”, dedi sog‘liqni saqlash va ijtimoiy ta’minot vaziri Yan Kristian Vestre.
Ta’kidlanishicha, yangi milliy strategiya doirasida Norvegiya insonlar salomatligi va atrof-muhitni radiatsiyaning salbiy ta’siridan himoya qilish uchun radioaktiv nurlanish va yadroviy xavfsizlikning yuqori darajasini saqlab qolish majburiyatini oladi.
Strategiya o‘nta aniq maqsadni o‘z ichiga oladi. Ular orasida radiatsiya va yadro energiyasi bilan bog‘liq hodisalar xavfini kamaytirish, shuningdek, mamlakat hukumati nazoratidan tashqari bo‘lgan manbalardan nurlanish xavfiga qarshi harakat qoidalarini ishlab chiqish va joriy etish mavjud. Bundan tashqari, Norvegiya bu sohada shaffoflik va ochiqlikka intilmoqda.
1957-yilda Norvegiya Xalqaro atom energiyasi agentligi (MAGATE)ga a’zo bo‘lgan. Bundan tashqari, mamlakat Yadro qurolini tarqatmaslik to‘g‘risidagi shartnomani imzolagan.
Bundan avval Senatning 26-iyundagi yalpi majlisida “Yadroviy zarar uchun fuqarolik javobgarligi to‘g‘risidagi Vena konvensiyasiga O‘zbekiston Respublikasining qo‘shilishi haqida”gi qonun ko‘rib chiqilib, ma’qullangani xabar qilingandi.
Izoh (0)