Amerikaning haftalik Time jurnali har yil yakuni bo‘yicha kino, san’at, shoular, kitob kabi sohalarda eng muvaffaqiyatli va muvaffaqiyatsiz kishilar nominatsiyalarini e’lon qilib keladi, deb xabar beradi “Kun” nashr saytidagi axborotga tayanib.

Shuningdek, nashrda “Yil odami” yo‘nalishida ham turli ijtimoiy va siyosiy soha vakillari nomi e’lon qilinadi. Bu yil mazkur yo‘nalishda “Yil odami” deb Hindiston bosh vaziri Narendra Modi e’lon qilindi.

Natijalarga ko‘ra, Hindiston bosh vaziri uchun 16,2 foiz kishi ovoz bergan. Mazkur nominatsiya bo‘yicha nomi kiritilganlar qatorida Fergyusondagi namoyishlar ishtirokchilari ham bo‘lib, ular 9,2 foiz ovoz to‘plagan.

Gongkongdagi referendumlarda faol ishtirok etgan Joshua Vong uchinchi (7 foiz), pokistonlik huquq faoli Malala Yusufzay esa to‘rtinchi (4,9 foiz) bo‘lgan. Beshinchi o‘ringa Ebola virusiga qarshi qahramonona kurash olib borgan shifokor hamda hamshiralar munosib ko‘rilgan (4,5 foiz).

Nashr reytingining 6-pog‘onasida Rossiya prezidenti Vladimir Putin (4,3 foiz ovoz bilan) bo‘lib, AQSh prezidenti Barak Obama undan kamroq (2,2 foiz) ovoz olgan.

Eslatib o‘tamiz, jurnal tomonidan o‘tgan yili “Yil odami” sifatida Rim papasi Fransisk tanlangan edi.