Toshkentda O‘zbekiston va Janubiy Koreya ishbilarmon doiralari ishtirokida kooperatsion birja o‘tkazildi. Bu haqda O‘zbekiston Milliy axborot agentligi xabar bermoqda.
O‘zbekiston Respublikasi Savdo-sanoat palatasi tomonidan tashkil etilgan ushbu tadbir ikki mamlakat kompaniyalari o‘rtasidagi savdo-iqtisodiy va investitsiyaviy hamkorlikni yanada rivojlantirish masalalariga bag‘ishlandi.
Kooperatsion birjaning ochilishida O‘zbekiston va Janubiy Koreya o‘rtasidagi iqtisodiy munosabatlar strategik sheriklik asosida rivojlanib borayotgani ta’kidlandi. Ayni paytda ikki mamlakat o‘rtasida 200 dan ziyod bitim imzolangan. O‘zbekistonda 412 qo‘shma korxona, shuningdek, Janubiy Koreyaning 81 kompaniyasi vakolatxonasi faoliyat yuritmoqda.
Tadbir ishtirokchilari iqtisodiyotning turli tarmoqlarida o‘zaro hamkorlik istiqbollarini muhokama qildi. Janubiy Koreya ishbilarmon doiralari vakillari “Navoiy” erkin industrial-iqtisodiy zonasi va “Angren” maxsus industrial zonasi doirasida O‘zbekiston bilan investitsiyaviy hamkorlik qilish imkoniyatlari bilan tanishtirildi.
“Bugun O‘zbekistonda chet ellik investorlar uchun qulay sharoit yaratilganiga yana bir bor amin bo‘ldik, — dedi Chonju universiteti Tadbirkorlikni qo‘llab-quvvatlash va rivojlantirish markazi rahbari, professor Chong Xo-Yon. — Ikki mamlakat ishbilarmon doiralarining o‘zaro manfaatli hamkorligi katta istiqbolga egadir”.
Tadbir yakunida O‘zbekiston Respublikasi Savdo-sanoat palatasi va Chonju universiteti Tadbirkorlikni qo‘llab-quvvatlash va rivojlantirish markazi o‘rtasida O‘zaro anglashuv memorandumi imzolandi.
Izoh (0)