Тошкентда Ўзбекистон ва Жанубий Корея ишбилармон доиралари иштирокида кооперацион биржа ўтказилди. Бу ҳақда Ўзбекистон Миллий ахборот агентлиги хабар бермоқда.
Ўзбекистон Республикаси Савдо-саноат палатаси томонидан ташкил этилган ушбу тадбир икки мамлакат компаниялари ўртасидаги савдо-иқтисодий ва инвестициявий ҳамкорликни янада ривожлантириш масалаларига бағишланди.
Кооперацион биржанинг очилишида Ўзбекистон ва Жанубий Корея ўртасидаги иқтисодий муносабатлар стратегик шериклик асосида ривожланиб бораётгани таъкидланди. Айни пайтда икки мамлакат ўртасида 200 дан зиёд битим имзоланган. Ўзбекистонда 412 қўшма корхона, шунингдек, Жанубий Кореянинг 81 компанияси ваколатхонаси фаолият юритмоқда.
Тадбир иштирокчилари иқтисодиётнинг турли тармоқларида ўзаро ҳамкорлик истиқболларини муҳокама қилди. Жанубий Корея ишбилармон доиралари вакиллари «Навоий» эркин индустриал-иқтисодий зонаси ва «Ангрен» махсус индустриал зонаси доирасида Ўзбекистон билан инвестициявий ҳамкорлик қилиш имкониятлари билан таништирилди.
«Бугун Ўзбекистонда чет эллик инвесторлар учун қулай шароит яратилганига яна бир бор амин бўлдик, — деди Чонжу университети Тадбиркорликни қўллаб-қувватлаш ва ривожлантириш маркази раҳбари, профессор Чонг Хо-Ён. — Икки мамлакат ишбилармон доираларининг ўзаро манфаатли ҳамкорлиги катта истиқболга эгадир».
Тадбир якунида Ўзбекистон Республикаси Савдо-саноат палатаси ва Чонжу университети Тадбиркорликни қўллаб-қувватлаш ва ривожлантириш маркази ўртасида Ўзаро англашув меморандуми имзоланди.
Изоҳ (0)