O‘zbekiston Respublikasi Vazirlar Mahkamasining 2014-yil 14-avgustdagi Yoshlar madaniyat va san’at markazini tashkil etish to‘g‘risidagi 232-son qarori Lex.uz saytida e’lon qilindi.
Unga ko‘ra, Yoshlar madaniyat va san’at markazi (Markaz) Madaniyat va sport ishlari vazirligi muassisligida davlat unitar korxonasi shaklida tashkil etiladi.
Qarorga muvofiq, O‘zbekiston Respublikasi Xususiylashtirish, monopoliyadan chiqarish va raqobatni rivojlantirish davlat qo‘mitasi, Madaniyat va sport ishlari vazirligi, Toshkent shahar hokimligi va O‘zbekiston “Kamolot” yoshlar ijtimoiy harakatining Toshkent shahar, Yunusobod tumani, Mustaqillik shoh ko‘chasi, 2-uy manzilida joylashgan Yoshlar ijod saroyi binosi, undagi mebel va jihozlar hamda moddiy-texnik vositalar bilan birgalikda O‘zbekiston “Kamolot” yoshlar ijtimoiy harakati Markaziy Kengashiga tasarruf etish huquqisiz bepul berildi.
Yoshlar ijod saroyi binosida Markazni ijara to‘lovisiz joylashtirish, shuningdek saroyning konsert va ko‘rgazma zallari, xonalari, mebel va jihozlari hamda moddiy-texnik vositalaridan bepul foydalanishi to‘g‘risidagi takliflarga rozilik berildi.
Qarorda Markazning tadbirkorlik faoliyatidan olingan daromadlar, muassisning byudjetdan tashqari mablag‘lari, yuridik va jismoniy shaxslarning homiylik xayriyalari hamda qonun hujjatlari bilan taqiqlanmagan boshqa manbalar tomonidan moliyalashtirilishi belgilab qo‘yildi.
O‘zbekiston Respublikasi Aloqa, axborotlashtirish va telekommunikatsiya texnologiyalari davlat qo‘mitasi Markazning zamonaviy talablarga javob beradigan veb-saytini yaratishga ko‘maklashadi.
Toshkent shahar hokimligi tomonidan ta’sis etilgan “YOShLAR IJOD SAROYINI SAQLASh VA EKSPLUATASIYA QILISh DIREKTSIYASI” davlat unitar korxonasi esa qonunchilikda belgilangan tartibda tugatiladi.
Izoh (0)