Rossiya nashri O‘zbekistonga sayohat qilish uchun beshta sababni sanab o‘tdi
“Vesti.ru” nashri rossiyaliklarni Yevropa, Osiyo, Amerika va hattoki Avstraliyalik sayyohlarning sevimli joyiga aylanib ulgurgan O‘zbekistonga tashrif buyurishga chaqirdi va u yerga sayohat qilish uchun sabablarni sanab o‘tdi.
“O‘zbekistondagi baland minoralar, chirmashib ketgan arab yozuvlari va murakkab geometrik naqshlar bilan bezalgan ulug‘vor madrasalar O‘zbekistonning tashrif qog‘oziga aylanib bo‘lgan”, — deb yozadi nashr avvalo o‘zbek me’morchiligiga to‘xtalib o‘tar ekan. Sayyohlarga sayohat yo‘nalishini Xivadan boshlab Samarqandda tugatish maslahat berildi. “Bu yo‘nalishda me’morchilikning yorqinligi va nafosati o‘sib borishini sezish mumkin”, — deyiladi xabarda.
Bundan tashqari, hunarmandchilik O‘zbekistonning o‘ziga xos jihati sifatida tilga olindi. “Bu yerda har qanday did va narxga yarasha qo‘lda yasalgan esdalik sovg‘alarini topish mumkin”, — deb yozadi nashr.
O‘zbek milliy taomlari sayyohlarni o‘ziga jalb qiluvchi yana bir xususiyat sifatida aytib o‘tildi. “O‘zbek pazandaligi aysbergining cho‘qqisida shubhasiz janobi oliylari palov turadi”, — deyiladi xabarda. Har bir viloyatda o‘ziga xos palov va non turlari borligi ham tilga olindi. O‘ziga xos o‘zbek taomlaridan tatib ko‘rmoqchi bo‘lganlarga maslahat sifatida tamaddixona yoki restoranlarga emas, mahalliy aholining uyiga tashrif buyurish kerakligi aytildi. “O‘shandagina siz dimlama, go‘ja va no‘xat sho‘rvadan bahramand bo‘lishingiz mumkin”, — deya qo‘shimcha qilindi.
O‘zbekistonda sayyohlarni o‘ziga tortuvchi yana bir omil, deya bozorlar ta’riflandi. “Savdogarlik o‘zbeklarning qon-qoniga singib ketgan, — deb yozadi nashr . — Zamonaviy O‘zbekistonning har bir fuqarosi sal bo‘lsa-da, savdogar”. O‘zbek bozorlari fotosuratchilar uchun yaxshi topilma ekani ham qistirib o‘tildi.
So‘nggi sayohat nuqtasi sifatida Orol dengiziga tashrif buyurish maslahati berildi. “Mavjud bo‘lmagan” dengizni ko‘rish va mahalliy aholidan uning qurish tarixini eshitish tanlovini qilish-qilmaslik sayyohlarning o‘ziga havola etildi.
Maqola so‘ngida O‘zbekistonga tashrif buyurish uchun ob-havo jihatidan eng qulay vaqt sentabr oyi ekanligi ta’kidlandi. Aynan shu vaqtda to‘y mavsumi boshlanishi, unda qatnashib boy sarguzashtlarni boshdan kechirish mumkinligi aytib o‘tildi.
