Android'ning avtomobil, televizor va soatlar uchun mo‘ljallangan versiyasi chiqariladi

Google kompaniyasi San-Faransiskoda o‘tkazilgan Google I/O konferensiyasida yangi Android L operatsion sistemasini taqdim etgani haqida avval xabar bergan edik.

Shuningdek, konferensiya davomida avtomobillar uchun Android Auto, televizorlar uchun Android TV hamda qo‘l soatlari uchun Android Wear nomli maxsus operatsion tizimlari ham namoyish etildi. Bu haqda Mail.Ru xabar berdi.

Google taqdim etgan Android Auto, Android TV hamda Android Wear’lar smartfon va planshetlar bilan bog‘liqligi, ovozli boshqarish va oson qidirish imkoniyatlari bilan bir-biriga o‘xshashdir.

Bular Google’ning shunchaki rejalari emas, deyiladi xabarda. Yil oxirigacha Android’li avtomobillar hamda televizorlar ishlab chiqarila boshlaydi. AQSh aholisi esa hozirning o‘zidayoq LG G Watch va Samsung Gear Live kabi aqlli soatlarni Google Play’dan sotib olishi mumkin.