Birlashgan Arab Amirliklarining Dubay shahrida rapid ya’ni tezkor shaxmat bo‘yicha jahon chempionati bahslari o‘tkazildi. Bu haqda O‘zbekiston Milliy Olimpiya qo‘mitasi matbuot xizmati xabar berdi.
Dunyoning yetakchi grossmeysterlari ishtirokida bo‘lib o‘tgan musobaqada 15 imkoniyatdan 11 ochko jamg‘argan norvegiyalik Magnus Karlsen birinchi o‘rinni egalladi. Undan yarim ochko kam jamg‘argan Fabiano Karuano (Italiya) ikkinchi, Vishvanatan Anand (Hindiston) esa uchinchi o‘rinni egalladi.
Nufuzli musobaqada O‘zbekistonning to‘rt nafar shaxmat ustasi ham ishtirok etdi. Ular orasida eng yuqori ko‘rsatkichga 17-jahon chempioni Rustam Qosimjonov sazovor bo‘ldi. Rustam 15 partiyadan uchtasida g‘alaba qozonib, to‘qqiz o‘yinda durangga imzo chekdi va 15 imkoniyatdan 7,5 ochko jamg‘ardi. So‘nggi olti turda umuman mag‘lubiyatga uchramagan Tohir Vohidov yakunda 7 ochko jamg‘ardi. Qolgan ikki nafar sportchi Jahongir Vohidov va Sergey Qayumovlar 6,5 tadan ochko to‘pladi.
19—20-iyun kunlari Dubay shahrida blits bo‘yicha jahon chempionati o‘tkaziladi. Shveysarcha tizimda 21 turdan iborat bo‘lgan mazkur musobaqada 43 davlatdan 116 nafar sportchi (98 nafari xalqaro grossmeyster) g‘oliblik uchun dona suradi.
Ushbu musobaqada O‘zbekiston sharafini Rustam Qosimjonov, Tohir Vohidov, Sergey Qayumov va Jahongir Vohidov himoya qiladi.
Izoh (0)