Germaniya Federativ Respublikasining O‘zbekistondagi favqulodda va muxtor elchisi Naythart Hyofer-Vissing 2014-yil 30-may kuni elchixonada bo‘lib o‘tgan tantanali marosim doirasida Germaniyada nemis tilini o‘rganish, tahsil olish va tadqiqot ishlarini olib borish bo‘yicha joriy yil stipendiyalariga oid diplomlarni o‘z egalariga topshirdi. 2014-yilda O‘zbekistondan jami 88 nafar talaba, o‘qituvchi va tadqiqotchi Germaniya oliy o‘quv yurtlari va tadqiqot institutlarida ilmiy izlanishlar olib borish bo‘yicha rag‘batlantiriladi. Bu haqda Germaniyaning Toshkentdagi elchixonasi matbuot xizmati xabar berdi.
Germaniyada o‘qishga doir stipendiyalar bakalavr yo‘nalishidagi ta’limni to‘liq qo‘llab-quvvatlash hamda tabiiy, texnik, ijtimoiy, iqtisodiy va gumanitar fanlar bo‘yicha nemis yoki ingliz tili o‘qitiladigan bir va ikki yillik magistraturani moliyalashtirishga asoslangan. Bundan tashqari, nemis tili bo‘yicha a’lo darajadagi bilimga ega o‘zbek talabalariga Germaniya oliy o‘quv yurtlaridagi yozgi kurslarda ishtirok etish uchun ham bir qancha stipendiyalar ajratilgan.
Shuningdek, Germaniya elchixonasida bo‘lib o‘tgan tantanali marosim doirasida O‘zbekiston davlat jahon tillari universiteti qoshidagi 2-sonli akademik litsey hamda Samarqand iqtisodiyot va servis instituti qoshidagi 1-sonli akademik litsey bitiruvchilariga Germaniya madaniyat vazirlari anjumanining nemis tili bo‘yicha 20 ta diplomi topshirildi. Xorijdagi maktablar bo‘yicha Germaniya markaziy boshqarmasi bilan hamkorlik qiladigan mazkur ikki litseyda talabalar nemis tili bo‘yicha 2-darajali diplomni olish uchun xalqaro doirada tan olingan til imtihonini topshiradi. Ushbu daraja xorijiy tillarni o‘rganish bo‘yicha umumyevropa standartlarining C1 darajasiga mos keladi.
Izoh (0)