Ўзбекистонлик талабалар Германияга ўқиш учун жўнатилади
Германия Федератив Республикасининг Ўзбекистондаги фавқулодда ва мухтор элчиси Найтҳарт Ҳёфер-Виссинг 2014 йил 30 май куни элчихонада бўлиб ўтган тантанали маросим доирасида Германияда немис тилини ўрганиш, таҳсил олиш ва тадқиқот ишларини олиб бориш бўйича жорий йил стипендияларига оид дипломларни ўз эгаларига топширди. 2014 йилда Ўзбекистондан жами 88 нафар талаба, ўқитувчи ва тадқиқотчи Германия олий ўқув юртлари ва тадқиқот институтларида илмий изланишлар олиб бориш бўйича рағбатлантирилади. Бу ҳақда Германиянинг Тошкентдаги элчихонаси матбуот хизмати хабар берди.
Германияда ўқишга доир стипендиялар бакалавр йўналишидаги таълимни тўлиқ қўллаб-қувватлаш ҳамда табиий, техник, ижтимоий, иқтисодий ва гуманитар фанлар бўйича немис ёки инглиз тили ўқитиладиган бир ва икки йиллик магистратурани молиялаштиришга асосланган. Бундан ташқари, немис тили бўйича аъло даражадаги билимга эга ўзбек талабаларига Германия олий ўқув юртларидаги ёзги курсларда иштирок этиш учун ҳам бир қанча стипендиялар ажратилган.
Шунингдек, Германия элчихонасида бўлиб ўтган тантанали маросим доирасида Ўзбекистон давлат жаҳон тиллари университети қошидаги 2-сонли академик лицей ҳамда Самарқанд иқтисодиёт ва сервис институти қошидаги 1-сонли академик лицей битирувчиларига Германия маданият вазирлари анжуманининг немис тили бўйича 20 та дипломи топширилди. Хориждаги мактаблар бўйича Германия марказий бошқармаси билан ҳамкорлик қиладиган мазкур икки лицейда талабалар немис тили бўйича 2-даражали дипломни олиш учун халқаро доирада тан олинган тил имтиҳонини топширади. Ушбу даража хорижий тилларни ўрганиш бўйича умумевропа стандартларининг C1 даражасига мос келади.
