Germaniya Federativ Respublikasining Toshkentdagi elchixonasi 2014-yil 3-iyun kuni O‘zbekiston Davlat konservatoriyasida fortepianochi Anna-Mariya Markovinaning klassik musiqa konsertini tashkil etadi. Konsert dasturidan taniqli bastakor Karl Filipp Emanuel Bax asarlari o‘rin olgan. Bundan tashqari, ikki nafar o‘zbek musiqachisi — Bekzod Turdiyev (nay) va Akmal Tursunov (g‘ijjak) Anna-Mariya bilan birgalikda Iogann Sebastyan Bax va Sulaymon Yudakovlarning asarlaridan ijro etadi. Bu haqda Germaniyaning Toshkentdagi elchixonasi matbuot xizmati xabar berdi.
Konsertdan tashqari, Anna-Mariya Markovina O‘zbekiston Davlat konservatoriyasi, R. Gliyer va V. Uspenskiy nomidagi Respublika ixtisoslashtirilgan musiqa akademik litseylarining talabalari uchun mahorat darslari o‘tadi.
Toshkentdagi tadbirlardan keyin Anna-Mariya Markovina Nukus (5-iyun), Urganch (6-iyun) va Farg‘ona (9-iyun) shaharlarida ham konsertlar beradi va o‘sha yerdagi san’at kollejlari talabalariga mahorat darslari o‘tadi.
2014-yil klassik musiqa olamida Karl Filipp Emanuel Baxning 300 yillik yubileyi nishonlanmoqda. Anna-Mariya Markovina mazkur bastakorning fortepianoga mo‘ljallagan asarlarining to‘liq to‘plamini Haenssler Classic studiyasida yozib chiqdi va ovoz yozish bo‘yicha Germaniya tanqidchilari uyushmasining mukofotiga sazovor bo‘ldi. Ushbu ijro butun dunyoda katta qiziqish bilan qarshi olindi.
Ma’lumot uchun: Xorvatiyada tug‘ilib o‘sgan Anna-Mariya Berlin, Vena va Vaymar shaharlarida tahsil olgan. Hozirda u Germaniyaning Kyoln shahrida istiqomat qiladi. O‘ziga xos uslubga ega ijodkor o‘z musiqiy faoliyatini Vitaliy Margulis, Anatol Ugorskiy va Paul Badura-Shkoda kabi taniqli murabbiylar rahbarligida boshlagan. U o‘z ijrosida rus maktabining texnik mukammalligi va Vena maktabi an’anasiga xos ravishda fortepiano asarlarining izchil tahlilini mujassamlashtirgan.
Izoh (0)