Германия Федератив Республикасининг Тошкентдаги элчихонаси 2014 йил 3 июнь куни Ўзбекистон Давлат консерваториясида фортепианочи Анна-Мария Марковинанинг классик мусиқа концертини ташкил етади. Концерт дастуридан таниқли бастакор Карл Филипп Эмануэл Бах асарлари ўрин олган. Бундан ташқари, икки нафар ўзбек мусиқачиси — Бекзод Турдиев (най) ва Акмал Турсунов (ғижжак) Анна-Мария билан биргаликда Иоганн Себастьян Бах ва Сулаймон Юдаковларнинг асарларидан ижро этади. Бу ҳақда Германиянинг Тошкентдаги элчихонаси матбуот хизмати хабар берди.
Концертдан ташқари, Анна-Мария Марковина Ўзбекистон Давлат консерваторияси, Р. Глиер ва В. Успенский номидаги Республика ихтисослаштирилган мусиқа академик лицейларининг талабалари учун маҳорат дарслари ўтади.
Тошкентдаги тадбирлардан кейин Анна-Мария Марковина Нукус (5 июнь), Урганч (6 июнь) ва Фарғона (9 июнь) шаҳарларида ҳам концертлар беради ва ўша ердаги санъат коллежлари талабаларига маҳорат дарслари ўтади.
2014 йил классик мусиқа оламида Карл Филипп Эмануэл Бахнинг 300 йиллик юбилейи нишонланмоқда. Анна-Мария Марковина мазкур бастакорнинг фортепианога мўлжаллаган асарларининг тўлиқ тўпламини Haenssler Classic студиясида ёзиб чиқди ва овоз ёзиш бўйича Германия танқидчилари уюшмасининг мукофотига сазовор бўлди. Ушбу ижро бутун дунёда катта қизиқиш билан қарши олинди.
Маълумот учун: Хорватияда туғилиб ўсган Анна-Мария Берлин, Вена ва Ваймар шаҳарларида таҳсил олган. Ҳозирда у Германиянинг Кёлн шаҳрида истиқомат қилади. Ўзига хос услубга эга ижодкор ўз мусиқий фаолиятини Виталий Маргулис, Анатол Угорский ва Паул Бадура-Шкода каби таниқли мураббийлар раҳбарлигида бошлаган. У ўз ижросида рус мактабининг техник мукаммаллиги ва Вена мактаби анъанасига хос равишда фортепиано асарларининг изчил таҳлилини мужассамлаштирган.
Изоҳ (0)