Qoraqalpog‘iston Respublikasi Beruniy tumanidagi chorvachilikka ixtisoslashgan “Bahouddin-Ilhom” fermer xo‘jaligida shifobaxsh echki sutini yetishtirish keng yo‘lga qo‘yilmoqda. Shu maqsadda Germaniyadan zotdor oq echkilar keltirildi, deb yozadi O‘zA.
— “Agrobank”ning Beruniy filialidan olingan 49 million so‘mlik imtiyozli kredit hisobiga 35 bosh oq echki va 12 bosh uloqcha xarid qildik, — deydi fermer xo‘jaligi rahbari Mansur Shomurodov. – Tez ko‘payadigan bu zotdor echkilar yiliga ikki marta uch-to‘rttadan uloq va kuniga 5 litrdan ziyod sut beradi. Suti quyuq hamda salomatlik uchun nihoyatda foydali.
Xo‘jalikning 40 gektarli sero‘t yaylovida boqilayotgan oq echkilar Orolbo‘yi iqlim sharoitiga tezda moslashib ketdi.
Ayni paytda xo‘jalikda ozuqa bazasini mustahkamlash hamda baliqchilikni yo‘lga qo‘yish bo‘yicha ham ish olib borilmoqda. Bu yana o‘n nafarga yaqin yoshni ish bilan ta’minlash imkonini beradi.
Izoh (0)