O‘zbekistonda har yili 450—550 milliard so‘mdan ziyod mablag‘ aholiga ichimlik suvi yetkazib berish, uning ta’minotini yanada yaxshilashga sarflanmoqda. 2014-yilda 1 ming 90 kilometr ichimlik suvi tarmoqlari qurish rejalashtirilgan. O‘tgan davrda 520 kilometrdan ko‘proq masofadagi ishlar bajarilib, 140 qishloq aholi punktida suv ta’minoti yaxshilandi, deb xabar bermoqda O‘zA.
Suv resurslaridan unumli va maqsadli foydalanish, tizimdagi asbob-uskunalarni ta’mirlash hamda suv inshootlarining ishonchli va barqaror ishlashini ta’minlash “O‘zkommunxizmat” agentligi faoliyatining asosiy yo‘nalishlaridan.
– Tuyamo‘yin-Nukus, Tuyamo‘yin-Urganch, Damxo‘ja va Zomin tumanlararo suv quvurlari, Chimyon-Chorvoq dam olish hududining magistral suv quvurlari agentligimiz tarkibiga kiradi, – deydi “O‘zkommunxizmat” agentligining mintaqalararo suv quvurlari faoliyatini muvofiqlashtirish bosh boshqarmasi boshlig‘i o‘rinbosari Tohir Haydarov. – Mintaqalararo suv quvurlarining umumiy quvvati bir kecha-kunduzda qariyb 800 ming kub metr bo‘lib, quvurlar o‘tgan hududlardagi shahar va tuman markazlari hamda qishloq aholisini sifatli ichimlik suvi bilan ta’minlaydi.
Osiyo taraqqiyot banki ishtirokida “Qo‘qon va Andijon shaharlari suv ta’minoti va kanalizatsiyasi tizimlari hamda Farg‘ona, Marg‘ilon va Rishton shaharlari suv ta’minoti tizimlarini qayta tiklash” loyihasi joriy qilinmoqda. Unga ko‘ra, 2012—2015-yillarda mazkur shaharlarda 55 kilometrlik ichimlik suvi tarmoqlari rekonstruksiya qilinib, 68 suv quvuri va 4 suv inshooti ta’mirlanadi. Iste’molchilarga ichimlik suvi ekologik jihatdan toza va salomatlik uchun zararsiz holda, eng muhimi, noqonuniy ravishda foydalanish imkonini bermaydigan polietilen quvurlar orqali yetkazib beriladi.
O‘zbekistonda ichimlik suvi ta’minoti va kanalizatsiya tizimlarini kompleks rivojlantirish hamda modernizatsiya qilishning 2013—2020-yillarga mo‘ljallangan rejasi asosida qirqqa yaqin loyiha bo‘yicha tadbirlar olib borilmoqda. Unga ko‘ra, dastlab bir nechta viloyatning suv inshootlari, quvurlari va tarmoqlari rekonstruksiya qilinadi va yangilari quriladi. Xususan, Namangan viloyatida bir kecha-kunduzda 300 ming kub metr suvni tozalab beradigan suv inshootini ta’mirlash va shuncha hajmdagi yangi “Obod” suv tozalash inshooti qurilishi davom etmoqda.
Ayni paytda aholi, xususan, qishloq aholisini toza va sifatli ichimlik suvi bilan ta’minlashga qaratilgan tadbirlar izchil davom ettirilmoqda. Bunda O‘zbekiston Respublikasi Vazirlar Mahkamasining joriy yil 25-fevralda qabul qilingan “Respublika aholi punktlarini sifatli ichimlik suvi bilan ta’minlash bo‘yicha qo‘shimcha chora-tadbirlar to‘g‘risida”gi qarori muhim ahamiyat kasb etmoqda. Unga ko‘ra, “O‘zkommunxizmat” agentligi tizimidagi korxonalarga yetti yillik muddatga yetti foizli lizing asosida suv tashishga mo‘ljallangan 483 maxsus texnikani yetkazib berish belgilangan.
Bundan tashqari, Qoraqalpog‘iston Respublikasi Vazirlar Kengashi va viloyatlar hokimliklari tasarrufidagi suv tashishga mo‘ljallangan 200 texnika suv ta’minoti korxonalari hisobiga o‘tkazib berildi. Qoraqalpog‘iston Respublikasida 28, Surxondaryo viloyatida 30, Buxoroda 30, Sirdaryo viloyatidagi 14 tirkama va maxsus suv tashish texnikasi shular jumlasidandir. Mazkur texnika vositalari ko‘magida markazlashtirilgan ichimlik suvi ta’minoti bo‘lmagan qishloqlar, xususan, tog‘li va cho‘l hududlardagi aholi punktlariga reja asosida ichimlik suvi yetkazib beriladi.
Izoh (0)